काठमाडौं । अमेरिकी सहयोग परियोजना मिलिनियम च्यालेन्ज कर्पोरेसन (एमसीसी) आजबाट कार्यान्वयनमा जाने भएको छ।
बुधबार दिउँसो सिंहदरबारस्थित अर्थ मन्त्रालयमा एक कार्यक्रम गरी अर्थमन्त्री डा प्रकाशशरण महत र नेपाल भ्रमणका रहनु भएका एमसीसी का उपाध्यक्ष क्यामरुन एलफोर्डले सयुक्त रुपमा एमसिसी कार्यान्वयनमा गएको घोषणा गर्ने तयारी छ ।
सम्झौताअनुसार पाँच वर्षमा परियोजना सम्पन्न गर्ने गरी कार्यान्वयनमा जाने समय यही भदौ १३ गते तोकिएको छ । यसैलाई लक्षित गर्दै परियोजना ‘इन्ट्री इन्टु फोर्स’ जाने मितिमा सम्झौता कार्य–सञ्चालनसम्बन्धी उपाध्यक्ष यहाँ आउनुभएको हो ।
एमसीसी सम्झौता अन्तरगत ऊर्जा र सडक पूर्वाधार विकाससम्बन्धी परियोजनामा पाँच सय मिलियन अमेरिकी डलर अनुदान सहयोग प्राप्त हुने उल्लेख छ ।
नेपालको नेतृत्वदायी भूमिका रहेको यस एमसीसी सम्झौताको प्रगतिबाट अमेरिकी सरकार उत्साहित भएको उहाँस्थित अमेरिकी दूतावासले जनाएको छ । नेपालमा एमसीसीको कार्य अवधिभर बृहत्तर सरोकारवाला, नेपालका सरकार र राजनीतिक दलहरूको निरन्तर सहयोगबाट मात्र यो सम्भव भएको दूतावासले जनाएको छ । “यस सम्झौताको सफल कार्यान्वयन सुनिश्चित गर्न एमसीए–नेपालसँग साझेदारी गर्न हामी प्रतिबद्ध छौँ । साथै, सम्झौताका लक्ष्य समयमै हासिल गर्न संलग्न सबैले लगनशीलताका साथ काम गरिरहेका छौँ”, दूतावासले उल्लेख गरेको छ ।
यसैबीच एमसीसी का उपाध्यक्ष क्यामरुन एलफोर्डले प्रधानमन्त्री पुष्पकमल दाहाल र अन्य उच्च सरकारी अधिकारी तथा बिभिन्न दलका नेताहरु संग भेट गर्ने कार्यक्रम रहेको छ ।
हिजो चार दलको समाजवादी मोर्चाले रुपन्देहीको बुटवलमा आयोजना गरेको सन्देश सभामा प्रधानमन्त्री दाहालले एलफोर्डसंग व्याख्यात्मक घोषणालाई सम्झौताको अंश बनाउने हो वा होइन भन्दै सिधा भाषामा प्रश्न राख्ने बताउनु भएको थियो ।
उहाँले भन्नुभएको थियो ‘अहिले एमसीसीबारे एक जना अधिकारी आउँदै हुनुहुन्छ । प्रधानमन्त्री भएकाले मसँग भेट्ने भइहाल्यो । व्याख्यात्मक घोषणालाई सम्झौताको अंश बनाउने हो वा होइन, म सिधा भाषामा राख्ने छु ।’समाजबादी मोर्चामा रहेका दलहरु एमसीसीका बारेमा बिभाजित छन् ।
