एजेन्सी । भारतले बुधबार साँझ चन्द्रमाको दक्षिणी ध्रुव नजिक अन्तरिक्ष यान सफलतापूर्वक अवतरण गर्ने पहिलो देश बनेर ऐतिहासिक उपलब्धि हासिल गरेको छ । जुलाई १४ मा प्रक्षेपण गरिएको चन्द्रयान–३ अन्तरिक्ष यानले भारतीय समयअनुसार साँझ ६ः०४ बजे सफ्ट ल्यान्डिङ गरी देशभर खुशीको लहर ल्याएको थियो ।
यो चन्द्रयानले एक दिन (१४ पृथ्वी दिन बराबर) चन्द्रमाको सतहको विस्तृत विश्लेषण गर्नेछ र पानीको निशान खोज्नेछ । अमेरिका, रुस र चीनपछि भारत चन्द्रमामा आफ्नो यान अवतरण गर्ने चौथो देश बनेको छ ।
भारतको चन्द्रयान सफलतापूर्वक चन्द्रमामा अवतरण गर्दा, सोशल मिडिया प्लेटफर्महरू भारतीय अन्तरिक्ष अनुसन्धान सङ्गठन (इसरो)लाई बधाई दिँदै थिए । यसैबीच इन्डियन प्रिमियर लिग (आईपिएल) फ्रान्चाइजी मुम्बई इन्डियन्सले आफ्नो ट्वीटर ह्यान्डलमा यस अवसरमा एक हास्यास्पद तस्बिर पोस्ट गर्यो ।
मुम्बई इन्डियन्सले इसरोको यस उपलब्धिलाई क्रिकेटसँग जोडेको छ र लेखेको छ कि ‘२०१९ मा इसरो र भारतीय टीम दुबै असफल थिए । अब इसरो सफल भएको छ, त्यसैले विश्वास गर्नुहोस् कि भारतीय टोली पनि क्रिकेट विश्वकप जित्न सफल हुनेछ ।’
२०१९ मा विराट कोहलीको कप्तानीमा टीम इण्डियाले उत्कृष्ट प्रदर्शन गर्यो र समूह चरणको शीर्ष स्थानमा रह्यो तर म्यानचेस्टरमा भएको सेमिफाइनलमा भारतले न्यूजिल्याण्डसँग २१ रनको हार बेहोरेको थियो । रोहित शर्माले २०२१ को अन्तमा एकदिवसीयमा कप्तानीको जिम्मेवारी सम्हालेका थिए र २०२३ को विश्वकप यस ढाँचामा कप्तानको रूपमा उनको पहिलो आईसीसी टूर्नामेन्ट हो ।
सन् २०१३ मा महेन्द्र सिंह धोनीको नेतृत्वमा टोलीले च्याम्पियन्स ट्रफी जितेपछि त्यसयता भारतको आईसीसी ट्रफीको खडेरी सुरु भएको थियो । रोहितको नेतृत्वमा, भारतले गत वर्ष टी–२० विश्वकपको सेमिफाइनल (इङ्गल्याण्ड विरुद्ध) र जुन २०२३ मा (अष्ट्रेलिया विरुद्ध) मा विश्व टेस्ट च्याम्पियनसिपको उपाधि भिडन्त गुमाएको थियो ।
एकदिवसीय विश्वकप यस वर्षको अन्त्यतिर अक्टोबर–नोभेम्बरमा भारतीय भूमिमा आयोजना हुनेछ । आयोजक भएकाले भारत उपाधि जित्ने दावेदारमध्येको एक हो । यस हप्ताको सुरुमा ब्याट्सम्यान केएल राहुल र श्रेयस अय्यरको पुनरागमनले भारतीय एकदिवसीय टोली थप बलियो भएको छ । दुवै एसिया कप टोलीमा परेका छन् । गत हप्ता तेज बलर जसप्रित बुमराहले पनि आयरल्याण्ड विरुद्धको टी–२० शृंखलामा ११ महिनाको अनुपस्थिति छि पुनरागमन गरे, जहाँ उनले भारतीय टोलीको नेतृत्व समेत गरे ।
