काठमाडौँ । सुन तस्करीमा जोडिएको नेकपा माओवादी केन्द्रका उपाध्यक्ष कृष्णबहादुर महराबारेमा पनि अब अनुसन्धान हुने भएको छ ।
बुधबार बसेको राष्ट्रिय मान्यताप्राप्त दलहरुको बैठकमा महरा प्रकरणसहित सुन तस्करीसम्बन्धी सबै प्रकरणको अनुसन्धान गर्नेगरी आयोग गठन गर्ने सहमति गरेको हो ।
त्रिभुवन अन्तर्राष्ट्रिय विमानस्थलबाट विद्युतीय चुरोट (भेप) मा सुन राखेर तस्करी भएको प्रकरणमा महराको नाम पनि जोडिएको थियो ।
सहमतिपत्रमा भनिएको छ, ‘विदेशबाट इलेक्ट्रिक सिगरेटमा सुन राखी अवैध पैठारी (तस्करी) गरिएको, मिति २०८० श्रावण २ गते ब्रेक सुमा राखी अवैध पैठारी (तस्करी) गरिएको सुन लगायत पटक पटक सुन तस्करी भई मुलुकभित्र आइरहेको विषयलाई गम्भीरतापूर्वक लिई स्वतन्त्र र निष्पक्ष छानबिन गर्न र यस्तो तस्करीजन्य कार्यको पूर्ण रुपमा नियन्त्रण गर्न मौजुदा कानूनमा गर्नुपर्ने परिमार्जन, संरचनागत सुधार र पटक पटकको सुन तस्करी सम्बन्धमा भएका छानबिन अनुसन्धानबारे समेत अध्ययन गरी सुझाव सहितको प्रतिवेदन पेश गर्न जाँचबुझ आयोग ऐन, २०२६ बमोजिम असोज ५ गते नेपाल सरकारले आयोग गठन गरी त्यसै दिनदेखि आयोगले कार्य प्रारम्भ गर्नेछ ।’
