काठमाडौँ । सीआईबीले ललिता निवास प्रकरणमा नाम मुछिएका पूर्व प्रधानमन्त्री तथा नेपाल समाजवादी पार्टीका अध्यक्ष डा बाबुराम भट्टराईको बयान लिएको छ ।
केन्द्रीय अनुसन्धान ब्युरो (सीआईबी) को टोलीले आईतबार भट्टराईको निवासमा पुगेर बयान लिएको सीआईबी प्रमुख एआईजी किरण बज्राचार्य बताइन् ।
नेसपाका प्रेस सल्लाहकार विश्वदीप पाण्डेले भट्टराईले एआईजी बज्राचार्यलाई निवासमा बोलाएर ललिता निवास प्रकरणबारे उठेको प्रश्नहरूबारे जवाफ दिएका जानकारी दिए । करिब ४५ मिनेटको छलफलमा भट्टराईले आफूलाई जानकारी भएको कुरा साझा गरेका उनले बताए ।
ललिता निवास प्रकरणमा मेरो पालाको मन्त्रीपरिषदको निर्णय सम्बन्धमा उठेका प्रश्नहरूवारे सत्यतथ्यको जानकारी मेरो शुरूदेखिको सार्वजनिक प्रतिबद्धता बमोजिम केन्द्रीय अनुसन्धान ब्यूरो ( सीआइबी ) लाई दिएर आफ्नो कर्तव्य निर्वाह गरेको छु! यो मुद्दा सफल टुंगोमा पुगेर देशमा सबै तहका सबै…
— Baburam Bhattarai (@brb1954) August 21, 2023
त्यसैगरी, सीआईबीलाई आफूले दिएको जानकारी बारे उल्लेख गर्दै डा. भट्टराईले ट्वीट गर्दै भनेका छन्, ‘यो मुद्दा सफल टुंगोमा पुगेर देशमा सबै तहका सबै प्रकारका भ्रष्टाचार तथा अनियमितता अन्त्य गर्न र सुशासनको प्रत्याभूति गर्न गराउन एउटा दरो प्रस्थानविन्दू बनोस् भन्ने कामना गर्दछु।’
यसअघि सीआईबीले पूर्वप्रधानमन्त्रीद्वय डा भट्टराई र माधव नेपालको बयान नलिई छानबिन प्रतिवेदन बुझाउने तयारी गरेको थियो ।
