एजेन्सी । नेपाली राष्ट्रिय क्रिकेट टिमका अलराउन्डर दीपेन्द्रसिंह ऐरी सम्मिलित मोन्टरिएल टाइगर्सले ग्लोबल टि२० क्यानडाको फाइनलमा स्थान बनाएको छ । शनिबार भएको सेमिफाईनल खेलमा भ्यानकुभेर नाइट्समाथि एक विकेटको रोमान्चक जित हात पार्दै टाइगर्स फाइनलमा पुगेको हो ।
यता, नेपाली क्रिकेट टोलीका स्पिनर सन्दीप लामिछाने सम्मिलित सर्रे जागुअर्स पनि पहिलो क्वालिफायरमा भ्यानकुभेर नाइट्सलाई ३८ रनले हराउँदै फाइनलमा पुगेको थियो । यससँगै आज आइतबार उपाधिको लागि दीपेन्द्रको टिम मोन्टरिएल टाइगर्स र सन्दीपको सर्रे भिड्नेछन् ।
भ्यानकुभेर नाइट्सले जितको लागि दिएको १ सय ३८ रनको मध्यम विजयी लक्ष्य टाइगर्सले १९.३ ओभरमा ९ विकेट गुमाउँदै पूरा गर्यो । अन्तिम ओभरमा जितको लागि १५ रन चाहिँदा टाइगर्सका शेर्फान रदरफोर्डले लगातार तीन छक्का हान्दै खेल जिताएका थिए ।
रदरफोर्ड ४८ रनमा अविजित रहे । दीपेन्द्रसिंह ऐरी २८ बलमा २ चौकासहित २५ रनमा आउट भए ।
एक समय ४.५ ओभरमा २९–४ को दयनीय अवस्थामा पुगेको टाइगर्सलाई दीपेन्द्र र रदरफोर्डले ४३ रनको महत्वपूर्ण साझेदारी गर्दै खेललाई मजबुत बनाएका थिए। यस्तै, आयन खान १८, आन्द्रे रसेल १७ र मोहम्मद वासिम १३ रनमा आउट भए ।
बलिङ तर्फ नाइट्सका जुनैद सिद्दिकले सर्वाधिक ४ विकेट लिए । फबिएन एलेन र कब्रिन बोसले समान दुई विकेट लिए ।
त्यसअघि टस हारेर पहिला ब्याटिङ गरेको नाइट्सले निर्धारित २० ओभरमा ६ विकेट गुमाउँदै १ सय ३७ रन बनाएको थियो । नाइट्सको लागि ओपनर मोहम्मद रिजवान ३९ रन, कब्रिन बोसले ३६ र हर्ष ठाकेरले २६ रन बनाए ।
टाइगर्सका अब्बास अफिदीले ह्याट्रिकसहित २९ रन खर्चेर ५ विकेट लिएका थिए ।
