काठमाडौँ । नेकपा (माओवादी केन्द्र) को भोलि बुधबारदेखि केन्द्रीय समिति बैठक बस्दैछ । बैठकको तयारीस्वरूप माओवादी केन्द्रको केन्द्रीय संगठन विभागको बैठक बस्दैछ ।
पार्टी उपमहासचिव तथा संगठन विभाग प्रमुख जनार्दशन शर्माले मंगलबार साढे एक बजेदेखि संगठन विभागको बैठक बोलाउनुभएको छ । उहाँका अनुसार संगठन विभागका तर्फबाट प्रतिवेदन तयार पारेर अध्यक्षलाई बुझाइसकिएको छ । “आज भोलि केन्द्रीय समितिको तयारीस्वरूप विभागका तर्फबाट आन्तरिक छलफल गर्नका लागि बैठक बस्दैछौँ”, उहाँले भन्नुभयो ।
आज बस्ने संगठन विभागको बैठकले हटाउनु पर्ने विभाग र संगठन तथा घटाउनु पर्ने विभाग र संगठनका आकारको विषयमा छलफल गर्ने बताइएको छ । माओवादी केन्द्रले यसपटकको केन्द्रीय समितिबाट संगठन र विभागलाई घटाएर चुस्तदुरुस्त बनाउन खोजेको छ ।
सोमबार र त्यसअघि बसेका पार्टी पदाधिकारी बैठकले संगठन र विभागका आकारहरू भद्दा भएका र जिम्मेवारीमाअनुसार काम हुन नसकेको निष्कर्ष निकाल्दै केन्द्रीय समितिमा परिमार्जनको प्रस्ताव लैजाने तयारी गरेको थियो ।
