काठमाडौँ । नेपाली काँग्रेसका महामन्त्री गगनकुमार थापाले संसदीय दलको नेता बदल्ने काममा आफू लागिरहने बताउनुभएको छ ।

सोमवार पार्टी केन्द्रिय समितिको बैठकमा बोल्दै उहाँले यस्तो बताउनुभएको हो । उहाँले सबै पुराना राजनीतिक दल संकटमा पर्ने कारण भनेको ३०÷३५ वर्षदेखि ४÷५ जना नेतामात्रै सत्ता र नेतृत्वमा घुमिरहनु रहेको बताउनु भयो । उहाँले संसदीय दलको नेता बदल्ने कुरा अहिलेको आवश्यकता भएकाले आफू अझै संसदीय दलको नेता फर्न लागिपर्ने बताउनु भयो ।

उहाँले पार्टी सभापति शेरबहादुर देउवाले आफू ५ पटक प्रधानमन्त्री बनिसकेकाले अर्को नेता पार्टीको संसदीय दलको नेता बनोस् भनेर आह्वान गर्ने अपेक्षा राखेको पनि बताउनु भयो । महामन्त्री थापाले आफूले पार्टी फुटाउने कुरा नगरेको भन्दै संसदीय दलको नेता फेर्ने कुरा गर्दा आत्तिन नपर्ने बताउनु भयो ।

उहाँले भन्नुभयो, ‘सबै पुराना राजनीतिक दल संकटमा पर्ने कारण भनेको ३०÷३५ वर्षदेखि ४÷५ जना नेतामात्रै म्युजिकल चियर खेलेको जस्तो आलोपालो गरेर नेतृत्व गरिरहेका छन् । त्यसैले पनि मानिसहरु रिसाएका छन् । त्यसैले पार्टी परिवर्तन गर्नुुपर्छ । यो कुनै व्यक्तिगत कुरा होइन, सभापतिज्यु मेरो पितातुल्य हुनुहुन्छ । तर म सार्वजनिक रुपमै भन्छु, नेपालको राजनीतिमा यो विषयले प्रवेश पाएन भने र यो व्यवस्था गरिएन भने के हुन्छ ? हाम्रो पार्टीको एउटा पद्धति छ । त्यो पद्धतिबाट पार्टी सत्तामा आउँछ । त्यो पार्टी सत्तामा हाम्रो पकड भएको कारणले गर्दा हामी त्यसको सत्तामा आउँछौँ । हामीले घुमिफिरी एक जना मात्रै नेतृत्वमा आउने प्रयास बदल्नुपर्छ ।

मेरो प्रयास जारी हुन्छ । त्यही भएर मैले नेपाली काँग्रेसको संसदीय दलको नेता बदल्ने प्रयास गरेँ । सकिनँ, परिणामलाई माने, मान्नैपर्छ । तर अब गर्नै मिल्दैन त, पार्टीको विधानले गर्न दिन्छ, आवश्यकता छ, सम्भव हुन्छ, कर्म गर्ने हो, फलको आश नगर्ने हो । मलाई लाग्छ गाह्रो छ, सांसदहरुको मत पाउने कुरा भनेको गाह्रै छ नि । गाह्रो छ थाहा छ, तर गाह्रो छ भनेर ठिक भएको काम छोड्न हुँदैन । म के चाहन्छु भने, सभापतिज्युले यसो एक दुई म्हिनापछि ल यार पाँच पटक भइसकेँ, छैटौँ पटक किन हुने ? को हुने हो अघि आउ भनिदिनुहुन्छ की ? राम्रै हो । म हुनुपर्छ पर्दैन, जो भएपनि हुन्छ । मैले साथ दिने हो तर कोही अघि नबढ्दा अघि बढ्ने हो नि । साथीहरु किन आत्तिनुभएको ? मैले पार्टी फुटाउने कुरा गरेको हो र ? मैले त दलको नेता फेर्ने कुरा गरेको हो । सभापतिज्युलाई यो कुरा ठिक हो भन्ने लागेको छ, वरिपरी बस्ने साथीलाई चिन्तित बनाएको छ । धेरै चिन्ता गर्नुपर्दैन । म बदल्न लागिरहन्छु, कसैले नसोध्नुहोला अब ।’

महामन्त्री थापाले वर्तमान सत्ता गठवन्धनको नेता काँग्रेस भएकाले आफ्ना शर्तहरुमाथि सम्झौता गर्नु नहुने बताउनु भयो । उहाँले अबको ४ वर्षमा देशमा संघीयता चाहिन्छ भन्ने मनोभावना विकास गर्ने चुनौति रहेको उल्लेख गर्नुभयो ।