काठमाडौँ । विराटनगरमा साइकल चालकमाथि मुक्का प्रहार गर्ने व्यक्तिलाई प्रहरीले पक्राउ गरेको छ ।
जिल्ला प्रहरी कार्यालय मोरङले १९ वर्षीय आयुष भेटवाललाई पक्राउ गरेको हो ।
भेटवालले विराटनगर महानगरपालिका ६ का २७ वर्षीय पवन साहलाई मुक्का प्रहार गरेका थिए । गत बुधबार राति साढे ८ बजे विराटनगर महानगरपालिका ४ दुधफार्मस्थित कोशी राजमार्गमा आयुषसहित ३ जना बा १५ च ३४४५ नम्बरको कारमा सवार थिए । कारमा १८ वर्षीय कुशल भेटुवाल र तेह्रथुमका ३० वर्षीय रोशन कार्की पनि थिए ।
राजमार्गमा विपरीत दिशाबाट आइरहेका साहलाई देखेपछि कारबाट ओर्लिएर आयुषले मुक्का हानेका थिए । मुक्का प्रहारपछि साह सडकमै बेहोस भएर ढलेका थिए ।
बेहोस भएका साहलाई आयुषले सडकमा केही परसम्म घिसारेको सिसीक्यामेरा फुटेजमा देखिएको थियो । उक्त घटनाको फुटेज सामाजिक सञ्जालमा भाइरल भइरहेको छ ।
पक्राउ परेका आयुषमाथि ज्यान मार्ने उद्योगमा म्याद थप भई अनुसन्धान भइरहेको प्रहरीले जनाएको छ । अन्य दुई जनाको खोजी भइरहेको प्रहरीको भनाई छ ।
साहको स्वास्थ्य अवस्था सामान्य रहेको बताइएको छ ।
