काठमाडौँ । काठमाडौँ महानगरले छात्रवृत्ति विवरण नबुझाउने ३९ विद्यालयलाई रु १ लाखसम्म जरिवाना गरेको छ । काठमाडौँ महानगर प्रमुख बालेन्द्र शाहले महानगरभित्र सञ्चालित ५०४ निजी विद्यालयमध्ये ४६५ ले मात्रै छात्रवृत्ति विवरण बुझाए पनि ३९ वटाले नुबझाएको भन्दै रु एक लाखसम्म जरिवाना ताेकेकाे जानकारी दिनुभयो ।
महानगरको इतिहासमा पहिलो पटक विद्यालयहरुले छात्रवृत्तिको विवरण बुझाएको पहिलो पटक भएको उहाँले बताउनुभयो । महानगरले छात्रवृत्ति अनिवार्यरुपमा उपलब्ध गराउन र त्यसको विवरण महानगरमा बुझाउन निर्देशन दिएसँगै १३ हजारभन्दा बढी विद्यार्थीले विभिन्न किसिमका छात्रवृत्ति प्राप्त गरेका छन् । प्राप्त विवरण निरीक्षण गरेपछि सूची प्रकाशित गर्ने समेत प्रमुख शाहले बताउनुभयो ।
साथै हालसम्म विवरण नबुझाउने बाँकी विद्यालयलाई रु एक लाख जरिवाना तिराएर थप एक पटक विवरण बुझाउन मौका महानगरले ती विद्यालयलाई दिएको छ । त्यसपछि पनि विवरण नबुझाए काठमाडौँ महानगरपालिका शिक्षा ऐन, २०७५ को दफा ५७ को उपदफा ४ बमोजिम विद्यालयलाई प्रदान गरिएको अनुमति वा स्वीकृति रद्द गर्ने गरी कारबाही गरिने महानगरले जनाएको छ ।
