विराटनगर । कोशी प्रदेशमा प्रदेश प्रमुख परशुराम खापुङले कोशी प्रदेश मन्त्रिपरिषद्को सिफारिसमा दुई वटा अध्यादेश जारी गर्नुभएको छ ।
प्रदेश प्रमुखको कार्यालयका प्रवक्ता नरेन्द्रकुमार श्रेष्ठका अनुसार खापुङ्गले कोशी प्रदेश आर्थिक अध्यादेश, २०८० र कोशी प्रदेश विनियोजन अध्यादेश, २०८० जारी गर्नुभएको हो ।
जनता समाजवादी पार्टी (जसपा) र नेकपा (माओवादी केन्द्र) ले प्रदेश सरकारबाट समर्थन फिर्ता लिएपछि अल्पमतमा परेको एमालेका मुख्यमन्त्री हिक्मत कार्की नेतृत्वको सरकारले अध्यादेशमार्फत बजेट ल्याएको हो ।
प्रदेश सरकारले कानूनी उल्झन आउने जोखिम देखेपछि बिहीबार नै आर्थिक वर्ष २०८०/०८१ को बजेट ल्याएको हो ।
अध्यादेशबाट बजेट ल्याउन मन्त्रिपरिषद्को सिफारिसमा प्रदेश प्रमुख खापुङले प्रदेशसभाको चालु वर्षे अधिवेशन बुधबार राति १२ बजेदेखि लागू हुने गरी अन्त्य गरिसक्नुभएको छ । बुधबार आगामी वर्षको बजेटको नीति तथा कार्यक्रम प्रदेश प्रमुख खापुङले प्रस्तुत गर्नुभएको थियो ।
