काठमाडौँ । नेपाली राष्ट्रिय क्रिकेट टोलीका पूर्व कप्तान सन्दीप लामिछाने र अलराउन्डर दीपेन्द्र सिंह ऐरीले क्यानडामा आयोजना हुने ग्लोबल टी–ट्वान्टी खेल्ने भएका छन् ।
मंगलबार राती भएको खेलाडी ड्राफ्टमा सन्दीपलाई सुरे ज्याकवारले आफ्नो टोलीमा अनुबन्ध गराएको हो । यस्तै दीपेन्द्रलाई मोन्टेरियल टाईगर्सले अनुबन्ध गराएको छ ।
सुरेमा सन्दीपका अलावा एलेक्स हेल्स, लिन्टन कुमार दास, जोसन बेहरेनड्रार्फ लगायत खेलाडी रहेका छन् । दीपेन्द्र आबद्ध मोन्टेरियलमा भने शकिव अल हसन, आन्द्रे रसेल, क्रिस लिन जस्ता खेलाडी रहेका छन् ।
सन्दीपले यस अघिका दुवै सिजनको ग्लोबल टी–ट्वान्टी लिग खेलिसकेका छन् । यता, दीपेन्द्रले भने पहिलो पटक विदेशी लिग खेल्न लागेका हुन् ।
यसअघि नेपालका सन्दीप र सोमपाल कामीसहित पारस खड्का, कुशल मल्ल र करण केसीले विभिन्न विदेशी लिग खेलिसकेका छन् । नेपालबाट सोमपाल र सन्दीपलले यसअघि नै यो प्रतियोगिता खेलिसकेका छन् ।
