काठमाडौं । प्रमुख विपक्षी दल नेकपा एमालेले राष्ट्रपति रामचन्द्र पौडेलबाट नागरिकता विधेयक प्रमाणीकरण गर्ने क्रममा किर्ते काम भएको विषय सदनमा उठाउने जनाएको छ ।
एमालेका प्रमुख सचेतक पदम गिरीले राष्ट्रपतिबाट मृत विधेयक प्रमाणीकरणका नाममा सरकारी कागजात किर्ते गरेको बाहिर आइसकेकाले यो विषयमा सदन मौन रहन नसक्ने बताए ।
तत्कालीन राष्ट्रपति विद्यादेवी भण्डारीले ९ बुँदे सुझावसहित फिर्ता पठाएको विधेयक प्रमाणीकरण नभएपछि गत असोजमा निष्क्रिय भएको थियो । निष्क्रिय रहेको विधेयक राष्ट्रपति पौडेलले प्रमाणीकरण गरिदिदा यो स्वीकार्य नरहेको सचेतक गिरीले बताए ।
‘संविधान बमोजिम निष्क्रिय भइसकेको विधेयक मन्त्रिपरिषद्को निर्णयको हवाला दिँदै राष्ट्रपतिबाट प्रमाणीकरण हुनु असंवैधानिक हो ।’, सचेतक गिरीले भने, ‘त्यसमाथि तत्कालीन सभामुखले हस्ताक्षर गरेको र तत्कालीन राष्ट्रपतिले प्रमाणीकरण नगरेको सरकारी कागजातमाथि अहिलेका राष्ट्रपतिले केरमेट गरेर आफ्नो नाम राखी प्रमाणीकरण गरेँ भन्नु सरासर किर्ते काम हो, यो स्वीकार्य छैन ।’
अहिले प्रतिनिधिसभाका सभामुख देवराज घिमिरे रहेकोले र तत्कालिन सभामुख अग्नि सापकोटा हुँदा राष्ट्रपतिमा रामचन्द्र पौडेल नभएको भन्दै सापकोटाको हस्ताक्षर भएको विधेयक प्रमाणीकरणको संवैधानिक ढाँचामा राष्ट्रपति पौडेलले हस्ताक्षर गर्नु किर्ते काम भएको उनको भनाई छ ।
