काठमाडौँ । प्रधानमन्त्री पुष्पकमल दाहाल ‘प्रचण्ड’ ले आफ्नो भारत भ्रमणलाई नागरिकता विधेयकसँग जोडेर हेर्न नहुने बताउनुभएको छ ।
नयाँदिल्लीमा पत्रकारहरुसँगको कुराकानीमा उहाँले नागरिकता विधेयक भारत भ्रमणकै दिन प्रमाणीकरण हुनु संयोग मात्र भएको बताउनुभयो । उहाँले भन्नुभयो, “मैले पहिले नै राष्ट्रपतिजीले प्रमाणीकरण गर्नुपर्छ भन्ने खोजेकै थिएँ । राष्ट्रपतिले सल्लाह गर्दैगर्दै जाँदा त्यही दिन पर्न आयो । म पहिला नै प्रमाणीकरण होस् भन्ने पक्षमा थिएँ ।”
प्रधानमन्त्री प्रचण्डले भारत भ्रमणसँग नजोडियोस् भन्ने आफ्नो पहिल्यैदेखि चाहना भएको प्रष्ट पार्नुभयो । राष्ट्रपति रामचन्द्र पौडेलले तत्कालीन राष्ट्रपति विद्यादेवी भण्डारीले ‘होल्ड’ गरेको नागरिकता विधेयक प्रधानमन्त्रीको भारत भ्रमणकै दिन प्रमाणीकरण गर्नुभएको थियो । उक्त विधेयक प्रमाणीकरण भएपछि चौतर्फी आलोचना भइरहेको छ ।
