काठमाडाैं । प्रहरी हिरासतमा रहेका कलाकार पल शाहमाथि दोस्रोपटक लिइएको १२ दिनको समय शुक्रबार सकिँदैछ । उनी बालिका बलात्कार कसुरमा अनुसन्धानका लागि प्रहरी हिरासतमा छन् । तनहुँ जिल्ला अदालतले दोस्रोपटक गत फागुन २२ गते शाहमाथि अनुसन्धान गर्न १२ दिनको समय दिएको थियो । यसअघि अनुसन्धानका लागि प्रहरीलाई अदालतले सात दिनको समय दिएको थियो ।
यही बीचमा जबरजस्ती करणीको अर्को मुद्दा नवलपुरमा दर्ता भयो । उनलाई फागुन २४ गते अनुसन्धानका लागि नवलपुर लगिएपछि तनहुँ प्रहरीले अनुसन्धानको बाँकी काम पूरा गर्न सकेको छैन । त्यसैले तनहुँ प्रहरीले अनुसन्धान नसकिएको भन्दै थप छ दिनको समय माग गर्न लागेको बताइएको छ । तर जिल्ला सरकारी वकिल कार्यालयले थप अनुसन्धानका लागि पाँच दिनको समय माग गर्न लागिएको बताएको छ । यदि अदालतले पाँच दिनको समय दिएको अवस्थामा यो नै अन्तिमपटक म्याद थप हुनेछ । त्यसपछि अदालतमा अभियोग दर्ता भई थुनछेक बहस हुने छ ।
जिल्ला सरकारी वकिल कार्यालय नवलपरासीका अनुसार थप समय राखेर अनुसन्धान गर्दा तनहुँमा दर्ता भएको पलविरुद्धको मुद्दा प्रभावित हुने भएकाले तत्कालका लागि आवश्यक अनुसन्धान सकेर तनहुँ पठाइएको छ । यद्यपि तनहुँको पनि अनुसन्धान सकिएर थुनछेक बहस भइसकेपछि पललाई अदालतसमक्ष बयानका लागि उपस्थित गराइने छ । जिल्ला सरकारी वकिल कार्यालय, नवलपरासी बर्दघाट सुस्ता पूर्वका अनुसार प्रतिवादीले अपराध गरेको पुष्टि हुने यथेष्ट प्रमाणहरु जिल्ला अदालतमा दर्ता भएको अभियोग पत्रमा पेश गरिएका छन् । पीडित बालिका र प्रतिवादी घटना भएको समयमा एउटै होटलमा बसेको पुष्टि भएको छ ।
गैँडाकोटस्थित एक रिसोर्टमा सुटिङका क्रममा सुटिङ युनिटले ६ वटा कोठा बुक गरेको र प्रतिवादी १०१ नम्बर तथा पीडित बालिका १०२ नम्बरको कोठामा बसेको पाइएको छ । सोही समयमा मध्यरातमा प्रतिवादी पीडित बालिकाको कोठामा गई सोही रात दुईपटक जवरजस्ती करणी गरेको पीडितको बयानलाई आधार मान्दै अभियोग पत्र दायर गरिएको छ । अभियुक्त शाहले बाहिर आएको अडियो आफ्नै भएको बयान दिएका छन् । सरकारी वकिलले अडियोलाई पनि प्रमाणका रुपमा पेस गरेको छ । तर अभियुक्तले भने आफू रातको समयमा बालिकाको कोठामा गए पनि करणी नगरेको बयान दिएका छन् ।
