काठमाडौँ । प्रधानमन्त्री पुष्पकमल दाहाल प्रचण्डले माओवादी लडाकुलाई राखिएको क्यान्टोन्मेन्टमा भ्रष्टाचार भएको आरोप कपोलकल्पित र पूर्वाग्रही रहेको बताउनुभएको छ ।
प्रतिनिधिसभाको बिहीबारको बैठकमा प्रश्नोत्तर शृंखलामा उहाँले यस विषयमा कसैले उजुरी गरेर छानबिन गरेर भ्रष्टाचार भएको प्रमाणित भए जेल जान तयार रहेको घोषणा गर्नुभयो ।
“म बडो जोड दिएर भन्न चाहन्छु, यो आरोपका लागि लगाइएको आरोप मात्र हो”, उहाँले भन्नुभयो, “शान्ति सम्झौता भएर पूर्वजनमुक्ति सेनालाई राख्ने निर्णय भइसकेपछि योद्धाहरूको रासन पानीको निम्ति राज्यबाट दिइएको रकमको अडिट भएर हिसाबकिताबको रेकर्ड राखिएको छ ।”
उनले यो विषयलाई राजनीतिक आग्रहका साथ उठाउने गरिएकोमा आफू आश्चर्यमा पर्ने गरेको उल्लेख गर्दै प्रधानमन्त्री प्रचण्डले भन्नुभयो, “अडिटबाट टुंगो लगाइसकेको विषय हो । तर, यदि कसैले उजुरी गरेमा आवश्यक छानबिन गरेर दोषी प्रमाणित भए म आफैँ जेल जान तयार छु ।”
क्यानोन्टमेन्टमा रहेका लडाकुलाई दिएको रकमको सबैको रेकर्ड भएको भन्दै उहाँले राज्यबाट दिएको रकम अडिट भएर टुंगो लागेको विषय पटक पटक ल्याइएर राजनीतिकरण गर्न खोजेको उहाँको भनाइ थियो ।
भ्रष्टाचारका सबै मुद्दा छानबिन गर्न आफूहरू तयार रहेको स्पष्ट पार्दै उहाँले तत्कालीन अर्थमन्त्री डा रामशरण महतले समेत रुजु गर्नुभएको जानकारी दिनुभयो ।
राष्ट्रिय प्रजातन्त्र पार्टीका सचेतक ज्ञानेन्द्रबहादुर शाहीले वास्तविक संख्याभन्दा बढी लडाकु भर्ती गरेको भनेर प्रचण्ड आफैंले स्वीकारेको भिडिओबारे प्रश्न गर्दै प्रधानमन्त्रीलाई क्यान्टोनमेन्टमा भएको भ्रष्टाचारबारे छानबिन गर्न पनि चुनौती दिनुभएको थियो ।
