एजेन्सी । महेन्द्र सिंह धोनीको कप्तानीमा रहेको चेन्नई सुपर किंग्सले इन्डियन प्रिमियर लिग (आईपीएल) २०२३ को प्लेअफतर्फ अघि बढेको छ । टोली अहिले प्लेअफबाट एक जित टाढा छ ।
बुधबार भएको सिजनको ५५ औँ खेलमा चेन्नईले दिल्ली क्यापिटल्सलाई २७ रनले पराजित गर्यो । चेपौकमा भएको यो जितसँगै चेन्नईको १२ खेलपछि १५ अंक छ । टोलीले थप २ खेल खेल्नुपर्नेछ ।
एमए चिदम्बरम स्टेडियममा टस जितेर ब्याटिङ गरेको चेन्नईले २० ओभरमा ८ विकेट गुमाएर १६७ रन बनाएको थियो । जवाफमा दिल्लीका ब्याट्सम्यानले २० ओभरमा ८ विकेट गुमाएर १ सय ४० रन मात्रै बनाउन सके ।
चेन्नईका लागि मिडल अर्डरमा शिवम दुबेले सर्वाधिक २५ रन बनाए भने ओपनर ऋतुराज गायकवाडले २४ रनको इनिङ्स खेले । रायुडुले २३ रनको योगदान दिए । योसँगै अजिंक्य रहाणे र रविन्द्र जडेजाले २१–२१ रन जोडे । अन्त्यमा धोनीले ९ बलमा दुई छक्का र एक चौकासहितको २० रनको इनिङ्स खेले । दिल्लीका लागि मिचेल मार्शले ३ विकेट लिए भने अक्षर पटेलले २ विकेट लिए । यस्तै, कुलदीप यादव, ललित यादव र खलिल अहमदले एक–एक विकेट लिए ।
१६८ रनको लक्ष्य पछ्याएको दिल्लीको सुरुवात सुस्त रह्यो । टोलीले ५० रनमै शीर्ष ३ विकेट गुमाएको थियो । यस्तो अवस्थामा मनिष पाण्डे (२७ रन) र मध्यमा रिले रुसो (३५ रन)ले अर्धशतकीय साझेदारी गर्दै टोलीलाई प्रारम्भिक झट्काबाट मुक्त गराए । तर, यो साझेदारीले विकेट रोकिए पनि छिटो रन बनाउन सकेन ।
यति हुँदाहुँदै पनि यो जोडीले खेल रोमाञ्चक बनाउने देखिएको थियो । तर मनिषपछि रुसो पनि आउट भए । त्यसपछि दिल्लीले लगातार विकेट गुमायो । चेन्नईका मथिशा पथिरानाले ३ विकेट लिए भने दीपक चाहरले २ विकेट लिए । यस्तै, रविन्द्र जडेजाको नाममा एक विकेट रह्यो ।
