एजेन्सी । इन्डियन प्रिमियर लिग (आईपीएल) २०२३ को ५४ औं खेलमा मुम्बई इन्डियन्सले रोयल च्यालेन्जर्स बैंग्लोरमाथि ६ विकेटको सहज जित दर्ता गरेको छ । टोलीले १६ दशमलव ३ ओभरमा २०० रनको लक्ष्य पूरा गरेको थियो । मुम्बईले आरसीबीविरुद्ध आफ्नो सबैभन्दा ठूलो रन पछ्यायो ।
टस हारेर पहिले ब्याटिङ गरेको बैंग्लोरले २० ओभरमा ६ विकेट गुमाएर १९९ रन बनाएको थियो । जवाफमा मुम्बईले सूर्यकुमार यादवको ८३ रनको बलमा लक्ष्य पुरा गर्यो । वानखेडे स्टेडियममा बैंगलोरमाथि मुम्बईको यो लगातार चौथो जित हो । रोहित शर्माको कप्तानीमा रहेको टोली बैंगलोरसँग २०१५ यता यहाँ हारेको छैन ।
यो जितसँगै मुम्बई अंक तालिकाको आठौं नम्बरबाट पाँच स्थान माथि उक्लिएको छ । ११ खेलमा मुम्बईको यो छैटौं जित हो । टोलीको १२ अंक छ । सूर्यकुमारको विस्फोटक पारी (३५ बलमा ८३ रन) र नेहल वढेरासँगको शतकीय साझेदारीले मुम्बईलाई सहज जित दिलायो । बैंगलोरका कप्तान फाफ डु प्लेसिसले यो साझेदारीलाई समयमै तोड्न सकेनन् ।
यो साझेदारी टुटेपछि मुम्बई जितको नजिक पुगेको थियो । मुम्बईका लागि सूर्याअघि ओपनर इशान किशनले २१ बलमा ४२ रन बनाएर टोलीलाई उत्कृष्ट सुरुवात गराए । नेहलले ३४ बलमा ५२ रन बनाएर सूर्यलाई साथ दिए ।
बैंगलोरका लागि वानिन्दु हसरंगा र विजयकुमार वैशाखले समान २–२ विकेट लिए ।
बैंगलोरको ब्याटिङमा कप्तान फाफ डु प्लेसिसले ४१ बलमा ६५ र ग्लेन म्याक्सवेलले ३३ बलमा ६८ रन बनाए । दिनेश कार्तिकले १८ बलमा ३० रनको योगदान दिए । मुम्बईका लागि जेसन बेहरेनडोर्फले ३ विकेट लिए । क्यामरन ग्रीन, क्रिस जोर्डन र कुमार कार्तिकेयले एक–एक विकेट लिए ।
