एजन्सी । इन्डियन प्रिमियर लिग (आईपीएल)को रोमाञ्चक खेलमा कोलकाता नाइट राइडर्स (केकेआर)ले सनराइजर्स हैदरावाद(एसआरएच)लाई ५ रनले पराजित गरेको छ ।
एसआरएचलाई अन्तिम ओभरमा ९ रन चाहिएको थियो, यो ओभरमा वरुण चक्रवर्तीले मात्र ३ रन दिएर आफ्नो टोलीलाई जित दिलाए ।
बिहीबार हैदरावादको राजीव गान्धी स्टेडियममा कोलकाताले टस जितेर पहिले ब्याटिङ गरेको थियो । टोलीले निर्धारित २० ओभरमा ९ विकेट गुमाएर १७१ रन बनाएको थियो । जवाफमा हैदरावादले ८ विकेट गुमाएर १६६ रन मात्रै बनाउन सक्यो ।
हैदरावादका अब्दुल समद र भुवनेश्वर कुमार अन्तिम ओभरमा ब्याटिङ गरिरहेका थिए । पहिलो २ बलमा २ रन दिएपछि तेस्रो बलमा वरुणले समदलाई आउट गरे । उनले अन्तिम ३ बलमा एक रन दिएर टोलीलाई जित दिलाए ।
१७२ रनको लक्ष्य पछ्याएको हैदरावादले पावरप्लेमा नै ३ विकेट गुमाएको थियो । सातौं ओभरमा ह्यारी ब्रुक पनि आउट भए र टोलीको स्कोर ५४र४ पुगेको थियो । ४ विकेट गुमाएपछि हैदराबादका लागि एडेन मार्कराम र हेनरिक क्लासेनले ७० रनको साझेदारी गरे । १५ औं ओभरमा क्लासेन र १७ औँ ओभरमा कप्तान मार्कराम आउट हुँदा दुवैले टोलीलाई जितको नजिक पुर्याइरहेका थिए । तर, १९औं ओभरमा रहमानउल्लाह गुरबाजले मार्को जान्सेनको हातमा डाइभिङ क्याच लिए । यस्तै। वरुण चक्रवर्तीले २० औं ओभरमा ९ रन बचाए । उनले जम्मा ३ रन दिएर टिमलाई जित दिलाए ।
टस जितेर पहिले ब्याटिङ गरेको कोलकाताले दोस्रो ओभरमा २ विकेट गुमाएको थियो । मार्को यान्सेनले रहमानुल्लाह गुरबाज र वेंकटेश अय्यरलाई पेभिलियन पठाए । पाँचौं ओभरमा कार्तिक त्यागीले जेसन रोयलाई पनि क्याच आउट गराए । टिमले निर्धारित ६ ओभरमा ३ विकेट गुमाएर ४९ रन बनाएको थियो ।
पावरप्लेमा ३ विकेट गुमाएपछि कोलकाताका लागि कप्तान नितिश राणा र रिंकु सिंहले साझेदारी गरेका थिए । रिंकु ४६ र राणा ४२ रन बनाएर आउट भए । त्यसपछि आएका आन्द्रे रसेलले ठूला प्रहार गर्न थाले पनि मयंक मार्कण्डेले उनलाई पेभिलियन पठाए । रसेलले १५ बलमा २४ रन बनाए ।
बाँकी ब्याट्सम्यानमा जेसन रोयले २०, अनुकुल रोयले १३, वैभव अरोराले २, शार्दुल ठाकुरले ८, वेंकटेश अय्यरले ७ र सुनिल नारायणले १ रन बनाए । हर्षित राना र रहमानउल्लाह गुरबाजले खाता पनि खोल्न सकेनन् । हैदरावादका मार्को यान्सेन र थांगारासु नटराजनले २–२ विकेट लिए । कार्तिक त्यागी, एडन मार्कराम, भुवनेश्वर कुमार र मयंक मार्कण्डेले १–१ विकेट लिए ।
