एजेन्सी । लखनउमा भएको आईपीएल खेलमा विराट कोहली र गौतम गम्भीरको भिडन्त फेरि एकपटक देखिएको छ । दुवै एक अर्काको अगाडि आए । ५ मिनेटसम्म चर्को बहस भयो ।
कुरा यति बढ्यो कि एलएसजीका कप्तान केएल राहुल र सिनियर खेलाडी अमित मिश्राले हस्तक्षेप गर्नु परेको थियो । यसपछि पनि कोहली र गम्भीर एकअर्कासँग रिसाए । यसअघि सन् २०१३ मा पनि यी दुईबीच चर्को बहस भएको थियो ।
खेलको क्रममा विराटले नवीन उल हकलाई जुत्ता देखाएर अपमान पनि गरेका थिए । विवादपछि एलएसजीका प्रशिक्षक गौतम गम्भीर र आरसीबीका पूर्व कप्तान विराट कोहलीलाई आईपीएलको आचार संहिता उल्लंघन गरेको आरोपमा खेल शुल्कको १०० प्रतिशत जरिवाना गरिएको छ । एलएसजीका बलर नवीन उल हकलाई पनि म्याच फीको ५० प्रतिशत जरिवाना गरिएको छ । कोहली र नवीनले आफ्नो गल्ती स्वीकार गरेका छन् ।
यस खेलमा रोयल च्यालेन्जर्स बैंगलोरले लखनउ सुपरजायन्ट्सलाई १८ रनले पराजित गरेको थियो ।
न त तथ्य न सत्य – कोहली
खेलपछि विराटले इन्स्टाग्राममा पोस्ट गरेका छन् । यसलाई सफाईको रुपमा हेरिएको छ । लेखेका छन्, ‘हामीले जे सुन्छौं, त्यो राय हो, तथ्य होइन । हामीले देख्ने सबै कुराको दृष्टिकोण हो, सत्य होइन।’
आरसीबीका खेलाडीहरू विराटसँगै गए । विराट त्यसपछि लखनउका अलराउन्डर काइल मेयर्ससँग कुराकानी गर्न थाले । त्यसपछि गम्भीर आए र मेयर्सलाई आफूसँगै लैजान थाले । त्यतिकैमा गम्भीरले केही भन्न थाले । कोहलीले जवाफ दिए । विवाद बढ्दै गएपछि दुवै खेलाडीबीच झडप भयो । अम्पायर र सिनियर खेलाडी अमित मिश्रा र लखनउ कोचिङ स्टाफ सदस्य विजय दहियाले हस्तक्षेप गरे ।
यसअघि १० अप्रिलमा, लखनउ सुपर जायन्ट्सले यस सिजनको १५ औं खेलमा रोयल च्यालेन्जर्स बैंगलोरलाई आफ्नो घरमा पराजित गर्यो । एम चिन्नास्वामी स्टेडियममा आरसीबीले २१२ रन बनाएको थियो । लखनउले खेलको अन्तिम बलमा लक्ष्य प्राप्त गर्यो । यो जितपछि लखनऊका मेन्टर गौतम गंभीरले आरसीबीका फ्यानहरूलाई अनुहारमा औंला राखेर चुप लाग्न इशारा गरेका थिए ।
दश वर्षअघि अर्थात सन् २०१३ मा आईपीएलको छैटौं सिजनको खेलपछि दुई खेलाडीबीच मैदानमा झडप भएको थियो । त्यतिबेला विराट कोहली आरसीबीमा थिए भने गौतम गम्भीर कोलकाता नाइट राइडर्सका कप्तान थिए ।
