काठमाडौँ । एसिसी मेन्स प्रिमियर कपको फाइनल खेलमा घरेलु टोली नेपालले आज संयुक्त अरब इमिरेट्स (युएई)सँग खेल्दैछ । नेपाल र युएईबीचको खेल बिहान ९ बजे कीर्तिपुरस्थित त्रिवि क्रिकेट मैदानमा सुरु हुनेछ ।
यस खेलको विजेता टोलीले आगमी सेप्टेम्बरमा हुने एसिया कपमा घरेलु टोली पाकिस्तान र भारतसँग खेल्न पाउनेछ ।
नेपालले समूह ए को विजेता हुँदै फाइनलमा स्थान पक्का गरेको हो । कुवेतसँगको सेमिफाइनल खेल वर्षाको कारण नतिजा विहीन बनेपछि नेपाल समूह विजेताको रुपमा फाइनलमा पुगेको थियो ।
उता युएईले सेमिफाइनलमा ओमानलाई दुई रनले पराजित गर्दै फाइनलमा स्थान बनाएको हो । अन्तिम बलमा विकेट लिँदै रोमान्चक रुपमा युएई फाइनलमा पुगेको थियो ।
आज फाइनल खेल वर्षाले प्रभावित हुने उच्च सम्भावना छ । काठमाडौंमा भारी वर्षाको सम्भावना रहेको छ । वर्षा भएमा खेल जहाँ रोकिएको छ अर्को दिन अर्थात् मंगलबार त्यहिँबाट नै सुरु हुनेछ । यदि मंगलबार खेलको नतिजा आउन नसकेमा सुपर ओभर खेलाउन प्रयास गरिनेछ ।
सुपर ओभर टाई भएमा अर्को सुपर ओभर हुनेछ । तर सुपर ओभर पनि हुन सक्ने अवस्था नरहेको खण्डमा नेपाल आइसिसी वरियताको कारण एसिया कपमा पुग्नेछ । नेपालको ओडिआई वरियता १४ औं र युएईको १९ औं छ ।
