एजेन्सी । बलिउड अभिनेता सलमान खानलाई धम्की दिएको आरोपमा फोन गर्ने व्यक्तिलाई नियन्त्रणमा लिइएको छ । मुम्बई प्रहरीले यसबारे जानकारी दिएको हो । धम्की दिने व्यक्ति १६ वर्षीय किशोर रहेको प्रहरीले जनाएको छ । प्रहरीले उनलाई शाहपुरबाट नियन्त्रणमा लिएर थप अनुसन्धानका लागि मुम्बई ल्याएको छ ।
मुम्बई पुलिसलाई सोमबार एक व्यक्तिको फोनमा अभिनेता सलमानलाई मार्ने धम्की आएको थियो । प्रहरीले आरोपीले आफ्नो नाम रकी भाइ रहेको बताएको थियो । फोन गर्ने व्यक्तिले आफू राजस्थानको जोधपुरबाट भएको र ३० अप्रिलमा सलमानलाई मार्ने बताएका थिए ।
यसअघि पनि सलमानलाई यसप्रकारको धम्की आएको थियो । यस मामिलामा जोधपुर निवासी धाकडरामलाई पक्राउ गरिएको छ । उनले सलमानको आधिकारिक मेलमा ३ वटा इमेल पठाएका थिए । यसमा लेखिएको थियो कि ‘सलमान खान अब तिम्रो पालो छ । तिमी जोधपुर आउनेबित्तिकै सिद्धु मूसेवाला जस्तै मारिनेछौ । जोधपुर आउ ।’
यसैबीच सलमान खानले नयाँ बुलेट प्रुफ कार किनेका छन् । यो निसान पेट्रोल एसयूभी हो । उनले उक्त कार विदेशबाट आयात गरेका हुन् । हालसम्म यो गाडी भारतीय बजारमा आइसकेको छैन ।
