एजेन्सी । खेलको अन्तिम ५ बलमा रिंकु सिंहको लगातार ५ छक्काको आधारमा कोलकाता नाइट राइडर्सले इन्डियन प्रिमियर लिग (आईपीएल)–२०२३ मा आइतबार दोस्रो जित हात पारेको छ । कोलकातालेले निकै रोमाञ्चक भिडन्तमा साविक विजेता गुजरात टाइटन्सलाई ३ विकेटले पराजित गरेको हो ।

आईपीएलको इतिहासमा यो पहिलो पटक भएको हो, जब कुनै टोलीले अन्तिम ५ बलमा ५ छक्का प्रहार गरेर जित निकालेको हो ।

कोलकाताले अन्तिम ओभरमा २९ रन जोडेको थियो । २० औं ओभरको पहिलो बलमा उमेश यादवले एक विकेट लिए । यसपछि रिंकु सिंहले लगातार ५ छक्का प्रहार गरे । बलर यश दयाल थिए ।

यसरी कोलकाताले अन्तिम ओभरमा ३१ रन बनाएर खेल जित्यो । रिंकुले २१ बलमा ४८ रनको विजयी इनिङ खेले । उनी खेलको प्लेयर अफ द म्याच भए । यो जितसँगै कोलकाता अंक तालिकाको दोस्रो स्थानमा उक्लिएको छ । उसको ४ अंक छ ।

अहमदाबादको नरेन्द्र मोदी स्टेडियममा टस जितेर ब्याटिङ थालेको गुजरातले २० ओभरमा चार विकेट गुमाएर २०४ रन बनाएको थियो । २०५ रनको लक्ष्य पछ्याएको कोलकाताको टोलीले २० ओभरमा ७ विकेट गुमाएर २०७ रन बनायो ।

कोलकातालाई २४ बलमा ५० रन आवश्यक थियो र टोलीको ६ विकेट बाँकी थियो । यस्तो अवस्थामा गुजरातका कप्तान राशिद खान आफैं बलिङ गर्न आएका थिए । उनले आन्द्रे रसेल, सुनिल नारायण र शार्दुल ठाकुरलाई आउट गर्दै ह्याट्रिक लिए ।

डिफेन्डिङ च्याम्पियन गुजरातले ३३ रनमा ऋद्धिमान साहा (१७ रन)को विकेट गुमाएको थियो । यस्तो अवस्थामा शुभमन गिल (३९ रन) र साई सुदर्शन (५३ रन)ले अर्धशतकीय साझेदारी गर्दै पारीलाई सम्हाले । सुदर्शनले यो सिजनको दोस्रो अर्धशतक प्रहार गरे । त्यसपछि विजय शंकरले २४ बलमा अविजित ६३ रन बनाएर टोलीलाई दुई सयको आँकडा पार गराए ।

२०५ रनको लक्ष्य पछ्याएको कोलकाताले २० रनमा पहिलो विकेट गुमाएको थियो । यहाँ गुरबाज (१५ रन) आउट भए । जोसुआ लिटिलले जगदीशन (६ रन) लाई आउट गरेपछि टोली दबाबमा आयो । ३ नम्बरमा भेङ्कटेश र ४ नम्बरमा कप्तान नितिश रानाले ५५ बलमा १०० रनको साझेदारी गर्दै केकेआरलाई समस्याबाट बाहिर ल्याएका थिए । यहाँ नितिश ४५ रन बनाएर आउट भए । कप्तान आउट भएपछि भेङ्कटेशले रिंकु सिंहको साथमा इनिङको नेतृत्व गरेका थिए । अय्यरले ४० बलमा ८३ रन बनाए ।

भेंकटेश आउट भएपछि रासिदले ह्याट्रिक गर्दै खेललाई फर्काए । यहाँ गुजरात सजिलै जित्छ भन्ने लाग्थ्यो, तर उत्साह यहीँ सकिएन । कोलकाताले अन्तिम ओभरमा २९ रन जोडेको थियो । जसलाई रिंकु सिंहले ५ छक्का प्रहार गर्दै खेल जिताए ।