एजेन्सी । इन्डियन प्रिमियर लिग (आईपीएल)को समूह चरण अन्तर्गत लखनउ सुपरजायन्ट्सले आफ्नो घरेलु मैदानमा दोस्रो जित निकालेको छ ।
केएल राहुलको कप्तानीमा रहेको लखनउले हैदरावादलाई ५ विकेटले पराजित गरेको हो । लखनउको हैदरावादमाथि लिगमा यो दोस्रो जित समेत हो । दुई टोलीबीच हालसम्म दुई खेल भइसकेका छन् र दुवै लखनउले जितेको छ । यो जितपछि लखनउको टोली अंक तालिकाको शीर्षस्थानमा पुगेको छ । लखनउको तीन खेलमा ४ अंक छ ।
शुक्रबार साँझ लखनउको एकना क्रिकेट स्टेडियममा टस जितेर पहिले ब्याटिङ गरेको हैदरावादले २० ओभरमा ८ विकेट गुमाएर १२१ रन बनाएको थियो । लखनउले १६ ओभरमा ५ विकेट गुमाएर १२२ रनको लक्ष्य पुरा गर्यो ।
सनराइजर्सका अब्दुल समदले १० बलमा २१ रन बनाएर अविजित रहे भने राहुल त्रिपाठीले ३५, अनमोलप्रीत सिंहले ३१ र वासिङ्टन सुन्दरले १६ रन बनाए । टोलीका ५ ब्याट्सम्यानले दोहोरो अंक छुन सकेनन् ।
लखनउका क्रुणाल पाण्ड्याले ३ र अमित मिश्राले २ विकेट लिए । यश ठाकुर र रवि बिश्नोईले १–१ विकेट लिए ।
जवाफमा कप्तान केएल राहुल (३५ रन) र काइल मेयर्सले लखनउलाई राम्रो सुरुवात दिलाए । दुवैले २७ बलमा ३५ रनको ओपनिङ साझेदारी गरेका थिए । मेयर्स १३ रन बनाएर आउट भए । त्यसपछि राहुलले दिपक र क्रुणालसँग पारी लम्ब्याए । उनले पाण्ड्यासँग अर्धशतकीय साझेदारी गरे ।
अन्त्यमा निकोलस पूरन ११ रन र मार्कस स्टोइनिस १० रनमा अविजित रहँदै टोलीलाई ५ विकेटले जित दिलाए । हैदरावादका आदिल रासिदले २ विकेट लिए । भुवनेश्वर कुमार, उमरान मलिक र फजलहक फारुकीले एक–एक विकेट लिए ।