बुटवल । ठूलो क्षेत्रफलमा सिँचाईसँगै विद्युतीकरणको महत्वाकांक्षी अभियानका रुपमा लिइएको कालीगण्डकी–तिनाउ डाइभर्सन बहुउद्देश्यीय आयोजना अघि बढ्ने क्रम जारी छ ।
शनिबार बुटवलमा परियोजनाको कार्यलय विधिवत् रुपमा स्थापना गरिएको छ । उपप्रधानमन्त्री विष्णु पौडेलले कार्यलयको उद्घाटन गर्दै उहाँले राष्ट्रिय गौरवको यो आयोजनाले सिंगो राष्ट्रको मुहार बदल्ने विश्वास व्यक्त गर्नुभयो ।
यस्तै उहाँले देश विकासलाई कायकल्प गर्ने यो आयोजनालाई सफल पार्न सबैलाई अपिल समेत गर्नुभयो ।
उपप्रधानमन्त्री पौडेलले श्रोतको प्रबन्धसँगै छिट्टै आयोजनाको प्रभावकारी कार्यान्वयन अघि बढ्ने बताउँदै आयोजनाका लागि स्रोतको कुनै कमी हुन नदिने प्रतिबद्धता समेत व्यक्त गर्नुभयो ।
स्याङ्जाको कालिगण्डकी नदीको पानी तिनाउ नदीमा खसालेर रूपन्देही र कपिलवस्तुका ठूलो क्षेत्रफलमा सिँचाई पुर्याउने तथा १२६ मेघावाट विद्युत निकाल्ने यो आयोजनाको प्रारम्भिक लक्ष्य रहेको छ ।
