काठमाडौँ । आईसीसी विश्वकप क्रिकेट लिग टूको अन्तिम खेलमा नेपालले युएईविरुद्धको खेल जितेर विश्वकप छनोटमा पुगेको छ ।
मौसम बदलीका कारण डीएलएस मेथडमा नेपाल युएई भन्दा अगाडि भएपछि खेल जितेको हो ।
यससँगै नेपाल जिम्बाबेमा हुने विश्वकप क्वालिफायरका लागि छनोट भएको छ । खराब मौसमका कारण अम्पायरहरूले खेल रोक्ने निर्णय गरेका थिए । नेपाल डीएल मेथडका आधारमा ९ रनले अगाडि भएको हो ।
जितको लागि ३ सय ११ रनको विशाल विजयी लक्ष्य पछ्याएको नेपालले ४४ ओभरमा ६ विकेट गुमाउँदै २ सय ६९ रन बनाउँदा खेल रोकिएको थियो । नेपालको जितमा गुलशन झा ४८ बलमा ४ चौका र २ छक्कासहित ५० अविजित रहे । दीपेन्द्र १० रनमा नटआउट रहे ।
नेपालको लागि भीम सार्की, कुशल भुर्तेल र आरीफ शेखले अर्धशतकिय ईनिङ खेले । भीम ७६ बलमा ९ चौका प्रहार गर्दै ६७ रनमा आउट हुदा भुर्तेल ३५ बलमा ४ छक्का र ३ चौकासहित ५० रन बनाएर आउट भए । यस्तै, आरीफले ६२ रनमा ५२ रन बनाए भने कप्तान रोहित पौडेल २५ बलमा १६ रन बनाएर आउट भए ।
बलिङतर्फ युएईका जुनैद्ध सिद्दिकले सर्वाधिक तीन विकेट लिए भने आयन खानले दुई र जहुर खानले एक विकेट लिए ।
कीर्तिपुरस्थित टियु क्रिकेट मैदानमा टस जितेर पहिले ब्याटिङ रोजेको युएईले निर्धारित ५० ओभरमा ६ विकेटको क्षतिमा ३१० रन बनाएको थियो। युएईका लागि आसिफ खानले शतक बनाएका थिए । उनले ४१ बलमा १०० रन पूरा गरेका थिए । आसिफ ओडिआईमा सर्वाधिक कम बलमा शतक प्रहार गर्ने चौथो खेलाडि बने । उनी १०१ रनमा अविजित रहे ।
यस्तै, युएईका कप्तान मोहम्मद वासिम, वृत्य अरविन्दले पनि अर्धसतक प्रहार गरेका थिए । अरविन्द १३८ बलमा ९४ रन बनाएर आउट भए भने वासिम ४९ बलमा ६३ रन बनाएर आउट भए । रोहन मुस्तफा २० रन बनाएर आउट भए ।
नेपालको लागि दिपेन्द्र सिङ ऐरीले २ विकेट लिए भने सन्दीप लामिछाने, ललित राजवंशी र सोमपाल कामीले एक एक विकेट लिए ।
