दाङ । नेकपा (एकीकृत समाजवादी) का अध्यक्ष माधवकुमार नेपालले राष्ट्रपतिका लागि आफ्नो नाम चर्चामा आए पनि यसका लागि बृहत् छलफलको आवश्यकता रहेको बताउनुभएको छ ।
मंगलबार दाङको भालुवाङमा पत्रकारहरुसँग कुराकानी गर्दै उहाँले आफूलाई राष्ट्रपतिको प्रस्ताव आउनु स्वाभाविक भएको तर यसबारे आफूलाई कसैबाट पनि ठोस प्रस्ताव नआएको बताउनुभयो । उहाँले यदि राष्ट्रपतिका लागि प्रस्ताव आए के गर्ने भन्नेबारे आफूले सोचिनसकेको पनि बताउनुभयो ।
राष्ट्रपति निर्वाचनलाई पावर सेयरिङको रुपमा पार्टीको भूमिका हुनुपर्ने उहाँको भनाइ थियो । अहिले बजारमा धेरै हल्ला र चर्चारपरिचर्चा भइरहेको भन्दै कुनै कुराको टुंगो नलागिसकेको अध्यक्ष नेपालले बताउनुभयो । “चाहना राख्ने कुरा बेग्लै हो, मैले आफूले के गर्ने भन्नेबारे सोचिसकेको छैन, हाम्रो पार्टीले पनि के गर्ने भन्नेबारे कुनै निर्णय गरिसकेको छैन तर पार्टीको धारणा भने पावर सेयरिङमा हाम्रो भूमिका हुनुपर्छ”, उहाँले भन्नुभयो । अरुका लागि सधैँ आफूले बलिदान नगर्ने उहाँको भनाइ थियो ।
नेकपा (एमाले) का अध्यक्ष केपी शर्मा ओलीले तपाईंलाई राष्ट्रपतिका लागि प्रस्ताव गर्नुभएको हो भन्ने पत्रकारहरुको जिज्ञासामा उहाँले कतिपय कुरा पर्दाभित्रै रहन दिँदा उपयुक्त हुने बताउनुभयो । “अहिले बोल्न हतार गर्नुहुन्न, प्रेसमा आएका सबै कुरा साँचो हुन्छन् भन्ने छैन, संविधानको संरक्षण गर्ने कुरामा हामी अत्यन्त चनाखो हुनुपर्छ”, अध्यक्ष नेपालले भन्नुभयो ।
उहाँले निर्वाचनअघि राष्ट्रपतिमा पार्टीका सम्मानित नेता झलनाथ खनालको नाममा नेपाली कांग्रेका सभापति शेरबहादुर देउवा र नेकपा (माओवादी केन्द्र) का अध्यक्ष पुष्पकमल दाहाल प्रचण्डबीच सहमति भएको खुलासा गर्नुभयो । नेता खनाल निर्वाचनमा पराजित भएकाले राष्ट्रपति को बन्ने भन्ने विषयमा ठोस निर्णय नभएको उहाँको भनाइ थियो । उहाँले नेपाली कांग्रेस, माओवादी केन्द्रलगायत दलहरुसँग शक्ति बाँडफाँटका विषयमा छलफल भइरहेको जानकारी दिनुभयो ।
