काठमाडौं । प्रधानमन्त्री पुष्पकमल दाहाल प्रचण्डले आज नियुक्त गर्नुभएका नयाँ मन्त्रीहरुले सपथ लिनुभएको छ ।
राष्ट्रपति भवन शीतल निवासमा राष्ट्रपति विद्यादेवी भण्डारीले उपप्रधानमन्त्री राजेन्द्र लिङ्देनसहित नयाँ मन्त्रीहरुलाई पद तथा गोपनीयताको सपथ गराउनुभएको हो ।
राष्ट्रिय प्रजातन्त्र पार्टी (राप्रपा) का अध्यक्ष लिङ्देनले उपप्रधानमन्त्रीसँगै ऊर्जा, जलस्रोत तथा सिँचाइमन्त्रीको जिम्मेबारी पाउनुभएको छ । राप्रपाबाटै विक्रम पाण्डे सहरी विकासमन्त्री, ध्रुवबहादुर प्रधान कानून मन्त्री र दीपकबहादुर सिंह ऊर्जा राज्यमन्त्री बन्नुभएको छ ।
त्यसैगरी राष्ट्रिय स्वतन्त्र पार्टी (रास्वपा) बाट शिशिर खनाल शिक्षामन्त्री, डिपी अर्याल श्रममन्त्री र डा तोसिमा कार्की स्वास्थ्य राज्यमन्त्री बन्नुभएको छ ।
नेकपा (माओवादी केन्द्र) बाट रेखा शर्मा सञ्चार तथा सूचना प्रविधिमन्त्री, सुदन किराती संस्कृति, पर्यटन तथा नागरिक उड्डयनमन्त्री, अमनलाल मोदी संघीय मामिला तथा सामान्य प्रशासनमन्त्री र सुशीला श्रीपालीले संस्कृति, पर्यटन तथा नागरिक उड्डयन राज्यमन्त्रीको सपथ लिनुभएको छ ।
त्यसैगरी नेकपा (एमाले) बाट रक्षामन्त्रीमा हरि उप्रेती, परराष्ट्रमन्त्रीमा विमला राई पौडेल, स्वास्थ्यमन्त्रीमा पदम गिरी, महिला बालबालिका मन्त्रीमा भगवती चौधरीले सपथ लिनुभएको छ । एमालेबाट विनाविभागीय मन्त्री बन्नुभएका ज्वालाकुमारी साह कृषिमन्त्री र राजेन्द्र राई भूमि व्यवस्था सहकारी मन्त्री बन्नुभएको छ ।
फोटो- प्रदिपराज वन्त /रासस