बुटवल । लुम्बिनी प्रदेशको सभामुख र उपसभामुखका लागि सत्ता गठबन्धन दलबीच सहमति भएको छ । सभामुख पदका लागि नेकपा (माओवादी केन्द्र) र उपसभामुख पदका लागि राष्ट्रिय प्रजातन्त्र पार्टी (राप्रपा) ले उम्मेदवारी दिने सहमति भएको हो ।
आजै माओवादी केन्द्रका तुलाराम घर्तीले सभामुख र राप्रपाकी मेनुका खाँणले उपसभामुखमा उम्मेदवारी दिनुहुनेछ । घर्ती पाल्पा २(२) बाट र खाँण समानुपातिक प्रदेशसभा सदस्यमा निर्वाचित हुनुभएको हो ।
प्रदेशसभा सचिवालयले आज दिउँसो उम्मेदवारी दर्ता गर्ने र भोलि निर्वाचन गर्ने कार्यतालिका सार्वजनिक गरिसकेको छ ।
सत्ता गठबन्धनबीच मुख्यमन्त्री नेकपा (एमाले) ले लिएको हुँदा सभामुख माओवादी केन्द्रको र उसभामुख राप्रपाको भागमा परेको हो ।
८७ सदस्यीय प्रदेशसभामा एमालेका २९, माओवादी केन्द्रका १०, राप्रपा र नागरिक उन्मुक्ति पार्टीका ४/४, जनमत पार्टी र लोकतान्त्रिक समाजवादी पार्टी (लोसपा) का ३/३ र दुई स्वतन्त्र प्रदेशभा सदस्यसहित कूल ५५ सदस्य सत्ता गठबन्धनमा रहेका छन् । सभामुख र उपसभामुख पदका लागि ४४ सदस्य भए बहुमत पुग्ने छ ।
प्रदेशमा नेपाली कांग्रेसका २७ तथा नेकपा (एकीकृत समाजवादी) र जनमोर्चाका १/१ सदस्य रहेका छन् ।
