एजेन्सी । स्पेनिस सुपर कपको उपाधि क्याटलान क्लब बार्सिलोनाले जितेको छ । साउदी अरेबियाको किंग फहद स्टेडियममा गएराति भएको फाइनल खेलमा चीर प्रतिद्वन्द्वी रियल मड्रीडलाई ३-१ गोलले पराजित गर्दै बार्सिलोना च्याम्पियन बनेको हो ।
बार्सिलोनाको जितमा गाभी, रोबर्ट लेवान्डोस्की र पेड्रीले एक एक गोल गरे । रियलका लागि करिम बेन्जेमाले एक गोल फर्काए ।
खेलको ३३ औं मिनेटमा गाभीले गोल गर्दै बार्सिलोनालाई सुरुवाती अग्रता दिलाएका थिए । उनलाई लेवान्डोस्कीले पास उपलब्ध गराए । यस्तै ४५ औं मिनेटमा लेवान्डोस्कीले गोल गर्दै बार्सिलोनाको अग्रता दोब्बर पारे ।
उनलाई गाभीले पास उपलब्ध गराए । खेलको दोस्रो हाफ अन्तर्गत ६९ औं मिनेटमा पेड्रीले गोल गर्दै बार्सिलोनालाई ३-० को अवस्थामा लगे । गाभीले उपलब्ध गराएको पासमा ‘अनमार्क’मा रहेका पेड्रीले ‘ट्याप’ गर्दै गोल गरे ।
खेल सकिनै लाग्दा इन्जुरी समयमा बेन्जेमाले सान्त्वना गोल गरे । बार्सिलोनाको यो समग्रमा १४ औं उपाधि हो । यस्तै सुपर कपको यो सर्वाधिक उपाधि पनि हो ।
