काठमाडौं । आइतबार पोखरामा भएको यती एयरलाइन्सको विमान दुर्घटनामा युवापुस्ताका चर्चित गिटारिस्ट तथा संगीतकर्मी निशान्त आचार्यको निधन भएको छ ।
आचार्यले पछिल्लो समय युटयुब र टिकटकजस्ता इन्टरनेटमा गिटारसम्बन्धी ट्युटोरियल सिकाउँदै आएका थिए। युवापुस्तामाझ छाएका उनको आफ्नै ‘केसिक्स बिफोर’ ब्याण्ड छ ।
आचार्यलाई रक गायक रविन तामाङ, अभया सुब्बा, रक ब्याण्ड मंकी टेम्पलसहित उनका फ्यानले सामाजिक सञ्जालमा श्रद्धाञ्जली व्यक्त गरेका छन् ।
आइतबार भएको विमान दुर्घटनामा हालसम्म ६६ जनाको शव फेला परेको छ भने ६ जना भने अझै भेटिएको छैनन् । काठमाडौंबाट पोखरातर्फ उडेको उक्त विमानमा चालक दलका सदस्यसहित ७२ जना सवार थिए ।
