काठमाडौँ । पब्जी मोबाइल ग्लोबल च्याम्पियनशिप (पीएमजीसी) २०२२ को फाइनल चरणको खेल आज शुक्रबरबाट सुरु हुँदैछ ।
आइतबारसम्म चल्ने खेलमा नेपाली ‘ट्रेन टु किल’ (टीटूके) र ‘डीआरएस गेमिङसहित १६ टिमले प्रतिस्पर्धा गर्दैछन् ।
पीएमजीसी अन्तर्गत समूह चरणमा ‘यल्लो ग्रुप’मा रहेको टीटूकेले शीर्ष तीनभित्र रहँदै फाइनलको यात्रा तय गरेको हो भने ‘डीआरएस गेमिङ’ले सर्भाइबल स्टेज र लास्ट चान्स खेल्दै फाइनलमा छनोट भएको हो ।
यो प्रतियोगिताको फाइनलको लागि १५ लाख अमेरिकी डलर (करिब २० करोड रुपैयाँ) कुल पुरस्कार राशि राखिएको छ । उक्त पुरस्कार पहिलो, दोस्रो र तेस्रोसँगै अन्य सहभागी टिमबीच विभाजन गरिनेछ ।
प्रतियोगिताको विजेता टिमले चार लाख डलर (करिब पाँच करोड ३४ रुपैयाँ) हात पार्नेछ भने दोस्रो हुने टिमले दुई लाख डलर (करिब दुई करोड ६७ रुपैयाँ) र तेस्रो हुनेले एक लाख २० हजार डलर (करिब एक करोड ६० रुपैयाँ) प्राप्त गर्नेछ ।
फाइनलका खेलहरु नेपाली समय अनुसार दिउँसो ४ः१५ बाट सुरु हुनेछ ।
