कैलाली । धनगढीमा ग्रेडरले ठक्कर दिँदा १५ वर्षीया बालिका चेतना साउदको मृत्यु भएपछि सुरु भएको आन्दोलन आज पनि विद्यार्थीले जारी राखेका छन् ।
धनगढीको हसनपुर पिपलचौतारा सडकखण्ड कालोपत्रे गर्ने क्रममा ग्रेडरले साइकलमा विद्यालय गइरहेकी साउदलाई ठक्कर दिदा घटनास्थलमा नै मृत्यु भएको थियो । सो क्षेत्रमा स्थानीय र विद्यार्थीहरुले चेतनालाई न्याय माग्दै प्रदर्शन गरिरहेका छन् ।
जिल्ला प्रशासन कार्यालयले भने हिजो साझ देखि अर्को सूचना जारी नहुदा सम्मको लागि निषेधाज्ञा लगाएको थियो। विद्यार्थीले निषेधाज्ञामै आन्दोलन गरिरहेका छन् । उनीहरुले दोषीलाई कारवाही र पीडित परिवारलाई उचित क्षतिपूर्तिको माग गरेका छन् ।
स्थिति सामान्य नभएसम्मका लागि अनिश्चितकालीन निषेधाज्ञा यथावत रहेको जिल्ला प्रशासन कार्यालयका सूचना अधिकारी शिवराज जोशीले जानकारी दिए ।
