काठमाडौं । १०२ वर्ष ६ महिनाको उमेरमा प्राण त्यागेका संस्कृतिवीद् सत्यमोहन जोशीको पार्थिव शरीर ललितपुर महानगरपालिकाको प्रांगणमा राखिने राष्ट्रिय सम्मान दिएपछि पार्थिव शरीर पुन: किस्ट अस्पतालमा ल्याइने भएकाे छ ।
इतिहास तथा संस्कृतिवीद् सत्यमोहन जोशीले धर्तिमा माइला टेकेको ठीक १०२ वर्ष ६ महिना प्रवेश गरेकै दिन अर्थात २०७९ साल असोज ३० गते आइतबार विहानै धर्ति त्यागेका छन् ।
पिता शंकरराज जोशी र माता राजकुमारी जोशीको जेठा छोराको रुपमा उनी १९७७ साल बैशाख ३० गते ललितपुरको बखुम्वहालमा जन्मेका थिए । किस्ट मेडिकल कलेज शिक्षण अस्पताल ग्वार्को, ललितपुरको सघन उपचार कक्षमा उपचाररत जोशीको आइतबार विहान निधन भएको अस्पतालका मेडिकल निर्देशक प्रा।डा।सुरज बज्राचार्यले जानकारी दिनुभयो ।
स्वास्थ्यमा सुधार देखिएपछि केहीदिन अघि उनलाई अस्पतालको डिलक्स क्याविनमा सारिएको थियो । तर उनलाई दिइएको एन्टिबायोटिक्सले काम नगरेपछि उनलाई फेरि सघन उपचार कक्षमै लगि थप उपचार थालिएको थियो ।
छातीमा निमोनिया संक्रमण र पिशाव थैलीमा संक्रमण देखिएपछि उनको उपचार भईरहेको थियो । असोज ७ गते उनलाई अस्पताल भर्ना गर्दा पिसावमा संक्रमण, मुटुको समस्याको साथै डेंगुको संक्रमण देखिएको थियोे ।
मरणोपरान्त आफ्नो मृत शरीर किस्ट मेडिकल कलेज शिक्षण अस्पताललाई दान दिने सार्वजनिक घोषणा गरिसकेका छन् ।
