काठमाडौँ । प्रहरीले काठमाडौँ कागेश्वरी मनोहरा नगरपालिकास्थित गोठाटारमा गार्मेन्ट सञ्चालक लाल मोहम्मदको हत्या आरोपमा तीन जनालाई सार्वजनिक गरेको छ ।
प्रहरीले घटनामा संलग्न आरोपमा पर्साका वीरगञ्ज महानगर वडा नं. १६ का २१ वर्षीय महोरम मियाँ, वीरगञ्ज १५ का १९ वर्षीय रेहान मियाँ र मकवानपुर बकैया गाउँपालिका १ की २१ वर्षीय सुुमी भन्ने सुस्मिता स्याङताङलाई पक्राउ गरी आज सार्वजनिक गरेको हो ।
घटनामा महोरम र रेहानले योजनाकार र तथा हतियार व्यवस्थापनको भूमिका खेलेको तथा सुमीले लाल मोहम्मदको गतिविधि निगरानी गर्ने कार्य गरेको प्रहरीले आरोप लगाएको छ ।
उनीहरुविरुद्ध ‘मुलुकी अपराध (संहिता) ऐन, २०७४ को परिच्छेद–१२ को ज्यान सम्बन्धी कसूर’ मुद्दामा काठमाडौं जिल्ला अदालतबाट अनुमति लिएर अनुसन्धान भइरहेको प्रहरीले जनाएको छ ।
मोहम्मदमाथि गत असोज ३ गते साढे ६ बजे गोली प्रहार भएको थियो । गोली लागेर घाइते भएका उनको महाराजगञ्जस्थित त्रिवि शिक्षण अस्पतालमा उपचारका क्रममा त्यही राति मृत्यु भएको थियो ।
