काठमाडौँ । प्रमुख प्रतिपक्षी दलका नेता एवं नेकपा (एमाले)का अध्यक्ष केपी शर्मा ओलीले प्रधानमन्त्री शेरबहादुर देउवासमक्ष चारवटा विषयमा कुरा राख्नुभएको छ ।
प्रधानमन्त्री निवास बालुवाटारमा आज बिहान भएको भेटमा अध्यक्ष ओलीले आगामी मंसिर ४ गते हुने प्रतिनिधिसभा एवं प्रदेशसभा सदस्य निर्वाचनको घोषणाका बेला सरकारले आफूहरुसँग परामर्श नगरेको बताउनुभयो ।
उहाँले आगामी निर्वाचन निष्पक्ष, धाँधलीरहित र विश्वसनीय हुनु पर्नेमा प्रधानमन्त्री देउवाको ध्यानाकर्षण गराउनुभएको भेटमा सहभागी नेकपा (एमाले) का उपाध्यक्ष विष्णु पौडेलले न्युजपोलारलाई बताउनुभयो ।
करिब ६ महिनापछि प्रधानमन्त्रीको सरकारी निवास बालुवाटार पुग्नुभएको अध्यक्ष ओलीले शान्ति प्रक्रिया तार्किक निष्कर्षमा पुगोस् भन्ने चाहेको धारणा राख्नुभएको थियो ।
अध्यक्ष ओलीले सरकारले प्रतिनिधिसभामा हालै बेपत्ता पारिएका व्यक्तिको छानबिन, सत्य निरुपण तथा मेलमिलाप आयोगको ऐन संशोधनसम्बन्धी विधेयक प्रमुख विपक्षी दलसँग छलफल नगरी ल्याएको भन्दै असन्तुष्टि जनाउनुभएको थियो ।
ओलीले प्रधानमन्त्री देउवासमक्ष अर्को राष्ट्रपतिले फिर्ता गरेको नागरिकता विधेयक फेरि संसद्मा प्रस्तुत गरेको विषयमा पनि कुरा राख्नुभएको छ । सरकारले दुबै सदनबाट नागरिकता विधेयक पारित गरी प्रमाणीकरणका लागि पठाएको सो विधेयक पुनरविचारका लागि पुनः संसद्मै फिर्ता पठाउनुभएको थियो ।
तर सरकारले फिर्ता भएको सो विधेयक पुनः प्रतिनिधिसभाबाट हुबहु पारित गरेको छ ।
अध्यक्ष ओलीले भेटमा प्रधानमन्त्री देउवासमक्ष मूल्यवृद्धिका बारेमा पनि कुरा राख्नुभएको छ । एमालेले दैनिक उपभोग्य वस्तुमा मूल्यवृद्धि भएको तर सरकारले नियन्त्रणका लागि खासै पहल नगरेको आरोप लगाउँदै आएको छ । ओलीले प्रधानमन्त्री देउवालाई मूल्यवृद्धि नियन्त्रण गर्न ध्यानाकर्षण गराउनुभएको उपाध्यक्ष पौडेलले जानकारी दिनुभयो ।
बालुवाटारमा भएको भेटमा एमालेबाट अध्यक्ष ओलीसँगै उपाध्यक्षद्वय सुवास नेम्वाङ र पौडेल सहभागी हुनुहुन्थ्यो । त्यस्तै भेटवार्तामा सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्की सहभागी हुनुहुन्थ्यो ।
सो अवसरमा प्रधानमन्त्री देउवाले एमाले अध्यक्ष ओलीले राख्नुभएको विषयमा सकारात्मक रुपमा लिएको बताउनुएको महासचिव पौडेलले बताउनुभयो । प्रधानमन्त्री देउवाले ती सबै विषयलाई पाँच दलीय गठबन्धनको बैठकमा राख्ने पनि जानकारी दिनुभएको थियो ।
साथै उहाँले अध्यक्ष ओलीलाई सरकार निष्पक्ष निर्वाचन गराउन प्रतिबद्ध रहेको विश्वास दिलाउनुभएको थियो ।
