काठमाडौँ । प्रधानसेनापति प्रभुराम शर्माले आगामी असार ४ गते लेबनान र सिरियाको भ्रमण गर्नुहुने भएको छ ।
नेपाली सेना, जनसम्पर्क तथा सूचना निर्देशनालय जंगी अड्डाले आज जारी गरेको प्रेस विज्ञप्तिअनुसार प्रधानसेनापति शर्माले संयुक्त राष्ट्रसंघको आह्वानमा शान्ति स्थापनार्थ नेपाली शान्ति सैनिकहरु तैनाथ लेबनानस्थित युनिफिल मिसन र सिरियास्थित युएनडोफ मिसनको निरीक्षण भ्रमण गर्नुहुनेछ ।
भ्रमणका क्रममा उहाँलगायतका भ्रमण टोलीले उक्त मिशनहरुको वस्तुस्थित, अपरेशनल गतिविधि, फौज तैनाथीको अवस्थालगायत अन्य विविध पक्षहरुका बारेमा जानकारी लिँदै र उक्त राष्ट्र तथा शान्ति मिशनका उच्चपदस्थ अधिकारीहरुसँग भेटघाट गर्नेछ ।
यस प्रकारको निरीक्षण भ्रमणबाट द्वन्द्वग्रस्त क्षेत्रमा तैनाथ फौजको हौसला अभिवृद्धि हुनुका साथै उच्चपदस्थ अधिकारीहरुसँगको भेटघाटबाट द्विपक्षीय आपसी हित तथा पारस्परिक सम्बन्ध थप वृद्धि हुने विश्वास नेपाली सेनाले लिएको विज्ञप्तिमा उल्लेख छ ।
सो निरीक्षण भ्रमणपश्चात प्रधान सेनापति शर्माले मित्रराष्ट्र संयुक्त राज्य अमेरिकाको औपचारिक निमन्त्रणामा मिति असार १३ गतेदेखि असार १७ गतेसम्म संयुक्त राज्य अमेरिकाको भ्रमण गर्नुहुने कार्यक्रम रहेको छ ।
उच्चस्तरीय सैनिक नेतृत्वबाट नियमितरुपमा हुने गरेको यस प्रकारको भ्रमण, विगत लामो समयदेखि स्थापित नेपाली सेना र अमेरिकी सेनालगायत दुई देशबीचको मैत्रीपूर्ण सम्बन्ध एवं विद्यमान द्विपक्षीय सहयोग तथा सहकार्यको क्षेत्रलाई थप व्यवस्थित र प्रभावकारी बनाउन महत्वपूर्ण सावित हुने विश्वास नेपाली सेनाले लिएको छ ।
