काठमाडौँ । सरकारले पेट्रोलियम पदार्थमा लाग्दै आएको कर घटाउने गृहकार्य थालेको छ । मन्त्रिपरिषद बैठकले सैद्धान्तिक सहमति दिएपछि अर्थ मन्त्रालयले पूर्वाधार र भन्सार करवापत प्रतिलिटर १० रुपैयाँ कर घटाउने तयारी गरेको हो ।
अर्थ मन्त्रालय स्रोतका अनुसार मन्त्रिपरिषदको बैठकमार्फत पेट्रोल र डिजेलमा प्रतिलिटर १० रुपैयाँ कर घटाइने भएको हो ।
जसअनुसार पूर्वाधारवापत ५ रुपैयाँ र भन्सार शुल्क ५ रुपैयाँ गरी १० रुपैयाँ घटाइनेछ । बजेटमार्फत पनि यसलाई सम्बोधनको तयारी गरिएको छ ।
यद्यपि, खाना पकाउने ग्यासमा भने कुनै शुल्क नघटाइने भएको छ । यसघि नेपाल आयल निगमले सरकारसँग लिटरमै १५ रुपैयाँ कर घटाउन प्रस्ताव गरेको थियो ।
हाल नेपालमा पेट्रोलको मूल्य प्रतिलिटर १८०, डिजेल र मट्टितेलको १६३ रुपैयाँ पुगेको छ । केही दिनअघि छिमेकी राष्ट्र भारतले पनि कर कटौती गरेको थियो । अत्याधिक करका कारण इन्धनको मूल्य निकै वृद्धि भएको भन्दै चर्को आलोचना भएपछि सरकारले केही कर घटाउन लागेको हो ।
