काठमाडौँ । गठबन्धनका तर्फबाट काठमाडौँ महानगरपालिकाको उपमेयरका उम्मेदवार रामेश्वर श्रेष्ठले मुख्य निर्वाचन अधिकृतसमक्ष निवेदन दिएका छन् ।
श्रेष्ठले आइतबार उम्मेदवार नभएको रुखमा खसेको मतसमेत आफ्नोमा कामय गरिदिन मुख्य निर्वाचन अधिकृत राजुकुमार श्रेष्ठसमक्ष निवेदन दिएका हुन् । रुखमा खसेको भोट पनि आफ्नोमा कामय गरिनुपर्ने उनले उल्लेख गरेका छन् ।
गठबन्धनले काठमाडौँको मेयरमा कांग्रेसकी सिर्जना सिंहलाई उम्मेदवार बनाएको छ भने उपप्रमुखमा एकीकृत समाजवादीका श्रेष्ठलाई अघि सारेको छ ।
निर्वाचन आयोगको पछिल्लो औपचारिक विवरण अनुसार श्रेष्ठ एमालेकी सुनिता डंगोलभन्दा करिब तेब्बर मतले पछि परेका छन् । उपप्रमुखमा करिब ३८ हजार मत बदर भएको श्रेष्ठले जनाएका छन् ।
‘उम्मेदवार नभएको निर्वाचन चिन्हमा मात्र मत सङ्केत गरिएको मतपत्रलाई सो पदका हदसम्म मात्र बदर गर्नुपर्नेमा प्रतिस्पर्धीद्वारा नै नभएका कलम र रुख चिन्हमा मतसङ्केत भए पनि म उम्मेदवार भएको कलम चिन्हको मत सङ्केतलाई समेत बदर गरी गणना गरेको र यसबाट मत परिणाममा असर परी, उपविजेता हुने उम्मेदवारले जित्ने र जित्ने उम्मेदवारले हार्ने अवस्थाको गणितीय अवस्था देखापरेको छ ।
तसर्थ स्थानीय तह निर्वाचन ऐन २०७३ को दफा १७, १९, २२, २४ र २६ को भावना र मनशायअनुसार हुनेगरी प्रतिस्पर्धी उम्मेदवार नै नभएका कलम र रुख चिन्हमा मतसङ्केत भएका मतपत्रमा म उम्मेदवार भएको कलम चिन्हको मतसङ्केतलाई सदरमानी स्थानीय तह निर्वाचन ऐन, २०७३ को दफा ५२ बमोजिम तत्काल पुनः दाहोर्याइ गणना गर्न र बाँकी मतपत्रसमेत यसै कानुनी आधारमा गणना हुन मतदान (मतगणना( अधिकृतलाई आदेश गरिपाउँ।’ उनले निवेदनमा भनेका छन् ।
