दमक । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीको गृहनगर झापाको दमक नगरपालिकामा एमाले पराजित भएको छ । स्थानीय तहको निर्वाचनमा दमक नगरपालिकाको प्रमुख पदमा राष्ट्रिय प्रजातन्त्र पार्टी (राप्रपा) का राम थापा निर्वाचित भएका छन् ।
थापाले १७ हजार ५२५ मत प्राप्त गरेका छन् भने उनका निकटतम प्रतिस्पर्धी एमालेकी गीताकुमारी पौडेल अधिकारीले १६ हजार ९६६ मत प्राप्त गरेकी छिन् ।
दमक नगरमा राप्रपालाई सत्ता गठबन्धनको सहयोग थियो भने एमाले एक्लै चुनावी मैदानमा ओर्लिएको थियो । राप्रपाका थापासँगै दमकमा एमालेको लामो समयदेखिएको विरासत ढलेको छ ।
सो नगरको उपप्रमुखमा नेपाली कांग्रेसकी रेगिना भट्टराई १७ हजार ७२ मत ल्याई निर्वाचित भइन् । उनका निकटतम प्रतिद्वन्द्वी एमालेका अम्बिकाप्रसाद खनालले १६ हजार ५७४ मत ल्याए ।
दमक विसं २०३९ सालमा गाउँपञ्चायतबाट नगर पञ्चायत बनेको थियो । सोही बेलादेखि दमकको नगरप्रमुख बन्ने सपना देखेका थापाले बहुदलीय प्रजातन्त्रको प्राप्तिसँगै नेपाल लोकतान्त्रिक गणतन्त्रमा प्रवेश गरेपछि आफ्नो सपना पूरा गरेका छन् ।
दमकको वडाध्यक्षसमेत भएका थापाले पहिलोपटक विसं २०४३ मा नगर प्रमुखमा लडेका थिए । तत्कालीन नगर पञ्चायतमा अहिलेकी प्रतिस्पर्धी गीता अधिकारीका ससुरासँग थापाले नगर प्रमुख पदमा थोरै मतले हार बेहोरेका थिए ।
