सिन्धुपाल्चोकको पाँचपोखरी थाङपाल गाउँपालिका–५ गुन्सा क्षेत्रमा तनाव बढेको छ । मतगणनाको विषयलाई लिएर नेपाली कांग्रेस र नेकपा (एमाले) का कार्यकर्ताबीच झडप भएपछि गुन्सा तनावग्रस्त बनेको हो ।
सो क्षेत्रमा दुवै पक्षबीच कुटाकुट र ढुंगामुढा भएको छ । स्थानीयवासीको अनुरोधमा झडप रोक्न अहिले सो क्षेत्रमा सुरक्षाकर्मी परिचालन गरिएको छ ।
बुधबार मतगणनाका क्रममा तीन वटा मत हराएको र चारवटा मतपत्रको अर्धकट्टी नै नभएको पाइएको थियो । त्यसपछि कांग्रेससहितका अन्य दलले पुनः मतगणना गर्नुपर्ने भन्दै मतगणना कार्य रोकेका थिए ।
विवाद बढ्दै गएपछि त्रासका कारण सहायक मतदान अधिकृत र एक गणक त्यहाँबाट सुटुक्क बाहिरिएका थिए । दुवै पक्षबीच वैमनश्य बढेपछि झडपको स्थिति भएको भन्दै प्रमुख जिल्ला अधिकारी वेदनिधि खनालले अहिले घटनास्थलमा सुरक्षाकर्मी खटाइएको बताए ।
विवाद बढ्दै गएपछि बुधबार नै प्रजिअ खनाल निर्वाचन अधिकारीको टोली घटनास्थलमा पुगेर विवाद मिलाएको थियो । विवाद मिलाउने क्रममा हराएका तीन वटा मतबारे सहमति कायम गरी पुनः मतगणना गरिएको थियो ।
सो वडामा एमालेका काले गोले १५ मतान्तरले विजयी बनेका छन् । त्यसपछि त्यहाँ तनावको स्थिति उत्पन्न भएको थियो । बिहीबार कांग्रेसका एक कार्यकर्ता मोटरसाइकलमा गुन्साबाट गाउँपालिका भवनतिर जाँदै गर्दा उनलाई एमालेको कार्यकर्ताको समूहले बाटो छेकी कुटपिट गरेको र मोटरसाइकलसमेत तोडफोड गरेको कांग्रेसको आरोप छ ।
सोही विषयलाई लिएर झडप भएको हो । कांग्रेसका कार्यकर्ताले पनि त्यसपछि नवनिर्वाचित गोलेको घरमा ढुंगामुढा र तोडफोड गरेका थिए । अहिले सुरक्षाकर्मी परिचालन भएपछि स्थिति केही हदसम्म शान्त बनेको छ ।
