गोरखा । गोरखा नगरपालिकाको प्रमुखमा नेकपा (माओवादी केन्द्र)का उम्मेदवारले जितेका छन् । माओवादी केन्द्रका कृष्ण राना मगर आठ हजार ९६४ मत ल्याई नगरप्रमुखमा निर्वाचित भएका हुन् । उनका निकटतम प्रतिस्पर्धी नेपाली कांग्रेसका उम्मेदवार राजनराज पन्त सात हजार १०८ मत ल्याई पराजित भए ।
विसं २०७४ को स्थानीय तहको निर्वाचनमा निर्वाचित पन्तले रानालाई एक हजार ५३४ मतले पराजित गरेका थिए । अहिले रानाले पन्तलाई एक हजार ८५६ मतले पराजित गरेका छन् । नगर प्रमुखमा उम्मेदवारी दिएकी नेकपा (एमाले) की सम्झना देवकोटाले चार हजार १०९ मत प्राप्त गरिन् ।
नगर उपप्रमुखमा कांग्रेसकी उम्मेदवार मसली माया थोकर सात हजार ४५३ मत ल्याई निर्वाचित भइन् । उनका निकटतम प्रतिस्पर्धी जनता समाजवादी पार्टी (जसपा) का नारायण खत्रीले छ हजार ७१८ मत हासिल गरे ।
गोरखा नगरपालिका रहेका १४ वटा वडामध्ये वडा नं १, २, ९, १०, १२ र १३ वडाका अध्यक्ष पदमा कांग्रेसका उम्मेदवार निर्वाचित भएका छन् ।
त्यस्तै माओवादी केन्द्रका वडाध्यक्षका उम्मेदवारले वडा नं ४, ७, ८, ११ र १४ तथा नेकपा एमालेका उम्मेदवारले वडा नं ३ र ५ मा विजय हासिल गरेका छन् । वडा नं ६ को अध्यक्ष पदमा स्वतन्त्र उम्मेदवार निर्वाचित भएका छन् ।
