काठमाडौ । नेपाली कांग्रेसका सभापति शेरबहादुर देउवाले वीपी कोइरालालाई फाँसी दिनुपर्छ भन्नेहरूले गठबन्धनको विरोध गरेको आरोप लगाउनु भएको छ ।
शुक्रबार काठमाडौंमा आयोजित पाँच दलिय गठबन्धनको चुनावी सभालाई सम्बोधन गर्दै सभापति देउवाले गठबन्धन वर्षौंसम्म बचाएर लैजानुपर्ने बताउनु भयो । उहाँले भन्नुभयो ‘म त भन्छु यो गठबन्धन धेरै वर्षसम्म बचाउनुपर्छ । गठबन्धन गर्दा सबैलाई फाइदा हुन्छ ।’
सभापति देउवाले देशको राजधानी सहरमा महिला उम्मेदवारले मेयरमा हार्नै नहुने समेत बताउनु भयो । उहाँले भन्नुभयो ‘सिर्जना सिंह योग्य महिला हुन् । राम्रो काम गर्ने वचन दिएकी छिन् । काठमाडौंजस्तो राजधानीमा महिला हार्नुहुँदैन । दुनियाँले के भन्छ ? राजदूतहरू यहीँ छन्, महिला हरायो भन्छन् । भरतपुरमा रेनुलाई पनि हराउन हुँदैन ।’
उहाँले भन्नुभयो देशकै राजधानीमा महिलालाई हराउँदा राष्ट्रिय–अन्तर्राष्ट्रिय क्षेत्रमा आलोचना हुन्छ । सभापति देउवाले भन्नुभयो ‘बुबाआमाले प्रकाशमानसँग बिहे गरिदिए त सिर्जनाको के दोष ? रेनुले पनि प्रचण्डकै छोरी बन्छु भनेर जन्मेको त हैन नि ? त्यसैले राम्रो काम गर्नेलाई जिताउनुपर्छ।’
तस्बिर- रत्न श्रेष्ठ, रासस
