काठमाडौँ । नेपालका लागि भारतीय राजदूतका लागि भारत सरकारले नवीन श्रीवास्तवलाई औपचारिरुपमा प्रस्ताव गरेको छ ।
भारतीय अखबार ‘द हिन्दुस्तान टाइम्स’ का अनुसार श्रीवास्तवलाई नेपालका लागि राजदूतमा पठाउन लागिएको हो । भारतीय प्रधानमन्त्री नरेन्द्र मोदीले आगामी जेठ २ गते पर्ने बुद्ध जयन्तीका अवसरमा गर्नुहुने नेपाल भ्रमण अगावै भारतले काठमाडौँमा नयाँ राजदूत पठाउन लागेको बताइएको छ ।
भारतीय विदेश मन्त्रालयमा पूर्वी एसिया डिभिजन हेर्ने श्रीवास्तवले दुई वर्षअघि लद्दाखमा चीनसँग सुरु भएको सीमा विवाद विषय सुल्झाउन कूटनीतिक र सैनिक संवादमा उल्लेखनीय भूमिका खेलेका थिए ।
यसअघिका नेपालका लागि भारतीय राजदूत विनयमोहन क्वात्राले भारतीय विदेश सचिवमा पदोन्नति भई कार्यभार सम्हाले पछि नेपालमा भारतीय राजदूतको पद रिक्त छ ।
वर्तमान अवस्थामा श्रीवास्तवले भारतीय विदेश मन्त्रालयलमा रहेर चीन, जापान, उत्तर र दक्षिण कोरिया तथा मंगोलिया मामिला हेर्दै आएका छन् । उनी चीन मामिलामा अनुभवी कूटनीतिज्ञ भएको भारतीय सञ्चार माध्यमहरुले बताउँदै आएका छन् । उनले चीनको सांघाईमा भारतीय कन्सुलर जनरलको रुपमा काम गरिसकेका छन् ।
