एजेन्सी । इंग्लिस फुटबल क्लब लिभरपुल यइएफए च्याम्पियन्स लिगको फाइनलमा प्रवेश गरेको छ ।
मंगलबार राति भएको दोस्रो चरणको खेलमा स्पेनिस क्लब भिल्लारियललाई ३–२ गोलले तथा समग्रमा ५–२ को नतिजासहित लिभरपुलले फाइनलमा स्थान बनाएको हो ।
गएराति सम्पन्न दोस्रो चरणको खेल भिल्लारियलको घरेलु मैदानमा भएको थियो । खेलको तेस्रो मिनेटमा नै बोलाए डियाले गोल गर्दै भिल्लारियललाई सुरुवाती अग्रता दिलाएका थिए । ४१ औं मिनेटमा फ्रान्सिस कोकलिनले गोल गर्दै भिल्लारियलको अग्रता दोब्बर पारे ।
तर, दोस्रो हाफमा लिभरपुल खेलमा फर्कियो । ६२ औं मिनेटमा फाबिन्होले, ६७ औं मिनेटमा लुइस डियाज र ७४ औं मिनेटमा साडियो मानेले गोल गर्दै लिभरपुललाई दोस्रो चरणमा पनि जित दिलाए ।
लिभरपुलले अब उपाधिका लागि आज राति हुने रियल मड्रिड र म्यान्चेस्टर सिटीबीचको विजेतासँग खेल्नेछ । फाइनल खेल मे २९ मा हुनेछ ।
