काठमाडौं । चौंथो संस्करणको एभरेष्ट प्रिमियर लिग (इपिएल) टी–ट्वान्टी क्रिकेटमा भैरहवा ग्लाडीयटर्सले पहिलो जित निकालेको छ ।
बुधबार कीर्तिपुरको त्रिवि क्रिकेट मैदानमा भएको खेलमा विराटनगर वारियर्सलाई ६ विकेटले पराजित गर्दै भैरहवाले पहिलो जित निकालेको हो ।
विराटनगरले दिएको ९० रनको सामान्य लक्ष्य भैरहवाले १५.३ बलमा ४ विकेट गुमाएर पूरा गर्यो ।
भैरहवाको जितमा उपुल थरंगाले अविजित रहँदै सर्वाधिक ३४ रनको योगदानी दिए । यस्तै कप्तान शरद भेषवाकर ६ रनमा अविजित रहे ।
प्रदिप ऐरीले २२ रन जोड्दा तमिम इकबाल र रोहित पौडेलले समान १२–१२ रन जोडे । विराटनगरका रामनरेश गिरिले २ विकेट लिए । करण केसी र बसन्त रेग्मीले १–१ विकेट लिए ।
यसअघि टस हारेर पहिले ब्याटिङ थालेको विराटनगर १७.४ बलमा अलआउट हुँदै ८९ रन बनाएको थियो । विराटनगरका दिल्शन मुनाविराले सर्वाधिक २५ रन बनाए ।
सुमित महर्जनले १३ रन जोड्दा आसिफ शेख र अनिल साहले समान ११–११ रन जोडे । भैरहवाका धम्मिका प्रसाद र आरिफ शेख ३–३ विकेट लिन सफल रहे ।
यस्तै अविनाश बोहराले २ तथा दुर्गेश गुप्ता र कृष्ण कार्कीले १–१ विकेट लिए । जितसँगै भैरहवाले २ खेलमा ३ अंक जोड्दै शीर्ष स्थानमा उक्लिएको छ ।
लगातार दोस्रो हारपछि विराटनगर पुछारबाट दोस्रो स्थानमा रहेको छ ।