जकार्ताः इन्डोनेसियाले पाल्म तेलको निर्यातमाथि बिहीबारदेखि लागू हुने गरी पूर्ण प्रतिबन्ध लगाएको छ । विश्वमै पाल्म तेलको उत्पादन गर्ने इन्डोनेसिया प्रमुख राष्ट्र हो ।
विश्व बजारमा वनस्पती तेलको मूल्य बढिरहेको अवस्थामा इन्डोनेसियाको यस कदमले बजारमा तेलको मूल्य अझ बढ्ने र तेल बजारलाई थप अस्थिर बनाउने अनुमान गरिएको छ ।
इन्डोनेसियामै खाना पकाउने तेलको आपूर्ति कम हुन थालेको तथा बजार मूल्य पनि बढेको छ । आजभोलि इन्डोनेसियाका विभिन्न शहर बजारमा सुपथ मूल्यका पसलबाट अत्यावश्यक सामान किन्न ग्राहकहरुले घण्टौं लाइन बस्नु पर्ने अवस्था सिर्जना भएको छ ।
दक्षिण पूर्वी एसियाली मुलुक इन्डोनेसिया विश्वमै धेरै जनसंख्या भएको मुलुकमध्येको एक हो । यहाँ सामानको अभाव र मूल्यवृद्धि भए सामाजिक तनाब सिर्जना हुने भन्दै सरकारमाथि विभिन्न विकल्पका बारेमा सोच्न बाध्य बनाएको छ ।
सरकारले पाल्म तेल सहित तेल बनाउने पाल्मका दानाको निकासीमा प्रतिबन्ध लगाएको छ । बाणिज्य मन्त्रालयले पाल्मसँग सम्बन्धित सबै किसिमका उत्पादहरुको निकासीमा प्रतिबन्ध लगाएको अर्थमन्त्री एयरलान्गा हार्टार्टोले बताउनु भएको छ ।
राष्ट्रपति जोको विडोडोले पनि आफ्नो सरकारले आफ्ना नागरिकलाई पहिलो प्राथमिकता दिने बताउनु भएको छ । विश्वमै सबैभन्दा धेरै पाल्म उत्पादक राष्ट्र भए पनि देशभित्र तेलको अभाव हुन थालेपछि यस्तो बाध्यकारी कदम चाल्नु परेको राष्ट्रपतिले स्पष्ट गर्नु भएको छ ।
इन्डोनेसियामा झण्डै २७ करोड जनसंख्या छ ।
इन्डोनेसियाले विश्वको कूल पाल्म तेल उत्पादनको झण्डै ६० प्रतिशत हिस्सा ओगट्ने गरेको छ । यसमध्ये झण्डै एक तिहाई तेल इन्डोनेसियामै खपत हुने गरेको छ । भारत, चीन, युरोपेली युनियन र पाकिस्तानमा इन्डोनेसियाली पाल्म तेलको निर्यात हुने गरेको छ ।
नेपालमा पनि इन्डोनेसिया, मलेसिया लगायतका मुलुकबाट पाल्मका दाना आयात गरी तेल निकालेर भारत समेतका मुलुकमा निर्यात हुने गरेको थियो ।
तेलको मूल्य प्रति लिटर ९७ सेन्टभन्दा तल आएपछि मात्र निकासी पुनः खुला गर्ने बताएको छ । अहिले बजारमा तेलको मूल्य ७० प्रतिशतभन्दा बढी भइसकेको छ ।
युक्रेनमाथि रसियाले आक्रमण गरेपछि विश्व बजारमा कृषिजन्य वस्तुहरुको मूल्य वृद्धि भइरहेको विश्व खाद्य तथा कृषि कार्यक्रमले जनाएको छ । एएफपी
