काठमाडौं । अमेरिकी सहयोग परियोजना (एमसीसी)का बारेमा पार्टीले लिएको निर्णय प्रति असन्तुष्टि जनाउदै आउनु भएका माओवादी केन्द्रका नेता नारायणकाजी श्रेष्ठलाई नेकपा महासचिव नेत्र बिक्रम चन्द 'विप्लव'ले सहकार्य गर्न आग्रह गर्नुभएको छ । श्रेष्ठको निबास हात्तिवनमा पुगेर विप्लवले राष्ट्रवादीहरूबीच नयाँ ढंगबाट एकता र सहकार्य गर्नुपर्ने अबस्था उत्पन्न भएको भन्दै सहकार्य गर्न आग्रह गर्नुभएको हो ।
एमसीसीका बारेमा श्रेष्ठ सहित गिरिराजमणी पोखरेल , कृष्णबहादुर महरा , अञ्जना विशंखे लगायतका नेताहरुले फरक मत राख्नु भएको थियो । उहाँहरुले पार्टी नेतृत्वले देशप्रति घात गरेको आरोप लगाउनु भएका थियो ।
सोमबार एमसीसीका बारेमा संञ्चारकर्मीहरु संग कुरा गर्दे अध्यक्ष पुष्पकमल दाहालले असन्तुष्टहरु पार्टी छाडेर गए हुने भन्दै श्रेष्ठलाई कटाक्ष गर्नुभएको थियो । दाहालको यो अभिव्यक्ति पछि अब कसरी अघि बढ्ने भन्ने दोधारमा रहनु भएका श्रेष्ठसंग भेटेर बिप्लवले सहकार्यको प्रस्ताव गर्नुभएको हो ।
श्रेष्ठ दाहालको अभिव्यक्ति बाट बिच्किएपछि मंगलबार उहाँलाई फकाउन दाहाल हात्तिबन पुग्नु भएको थियो । उहाँले एमसीसीमा फरक दृष्टिकोण राख्दै अन्य बिषयमा सहकार्य गरेर अघि बढ्न आग्रह गर्नुभएको थियो । तर श्रेष्ठले पार्टी छाडेर जाने सक्ने भनेकाले आफुले सोच्नु पर्ने जबाफ दिनुभएको थियो । विप्लवसँगको भेटमा श्रेष्ठले माओवादीमा बस्न गाह्रो हुने सुनाउनु भएको थियो ।
उहाँले विप्लवसँगको भेटमा भन्नुभयो "एमसीसीमा नेतृत्वले धोका दियो एकीकृत समाजवादीको नेतृत्वले पनि धोका दियो । असहमतिबीच माओवादीमा बस्न गाह्रो छ ।"
