नेपालगञ्ज । मानवसेवा आश्रम (मानवता प्रवर्द्धन महाअभियान) ले नेपालगञ्ज शाखा विस्तार गरेर सहयोगापेक्षी (बेसहारा, अशक्त, असहाय, अनाथ, अभिभावकविहीन, मानसिक तथा शारीरिक रुपमा कमजोर) सडकआश्रित मानवहरुको उद्धार सुरु गरेको छ ।
मानवसेवा आश्रमको १९ औं जिल्ला शाखाको रुपमा बाँके जिल्लाको नेपालगञ्जमा शाखा विस्तार गरिएको केन्द्रीय सदस्य सृजना ओलीले बताइन् । संस्थाले कर्णाली प्रदेशको सुर्खेत, लुम्बिनी प्रदेशको दाङ र सुदूरपश्चिम प्रदेशको कैलालीमा शाखा विस्तार गरिरहेको भएपनि यि तिनै प्रदेशका शाखासँग समन्वय गर्ने र नेपालगञ्ज आफैमा ठुलो शहर भएकोले यहाँका सडकमानवको व्यवस्थापनका लागि नेपालगञ्जमा शाखाको महशुस भएपछि नयाँ बर्षको अवसर पारेर शाखा विस्तार भएको हो ।
बर्दिया जिल्लाको गुलरीया नगरपालिकाको सडकमा बेवारिसे जीवनयापन गरिरहनुभएको एक ६९ बर्षीय महिलाको उद्धार गरी शाखाको सुरुवात भयो ।
हेटौंडा उपमहानगरपालिकाबाट सुरुवात भएको संस्थाको हाल १८ जिल्ला शाखा सञ्चालनमा छन् जसमा करिब १५०० जना विभिन्न उमेरसमूहका सडकपेटी एवं सार्वजनिक स्थलहरुमा रहन बाध्य भएका व्यक्तिहरुको उद्धार गरेर संरक्षण गरेको छ । संस्थाले वि.स २०८२ सालसम्म देशलाई सहयोगापेक्षी सडकआश्रित मानवमुक्त बनाउने लक्ष्य लिएको छ ।
