पोखरा । गण्डकी प्रदेशका अर्थमन्त्री रामजी बराल ‘जीवन’ को गाडीले ठक्कर दिँदा घाइते भएका एक जनाको मृत्यु भएको छ।
नयाँ वर्षका दिन वैशाख १ गते ग १ झ ४४५ नम्बरको अर्थमन्त्रीको गाडीले तनहुँको शुक्लागण्डकी–२ एक्लेखेतका मीनबहादुर पाइजालाई ठक्कर दिएको थियो ।
गाडीको ठक्करबाट गम्भीर घाइते पाइजाको उपचारका क्रममा गएराति मृत्यु भएको हो ।
पोखराको खुदीमा बिहान करिब ९ बजे मिनबहादुर ग १६ प ५१८१ नम्बरको मोटरसाइकलमा श्रीमती दानुमायालाई लिएर सवार थिए। तीव्र गतिमा चलेको अर्थमन्त्रीको गाडीले पाइजा दम्पती चढेको मोटरसाइकललाई ठक्कर दिएको थियो ।
ठक्करबाट गम्भीर घाइते पाइजाको ५ दिनसम्म होस नखुलेको र छैठौं दिनमा मृत्यु भएको अस्पतालले जनाएको छ ।
माओवादी केन्द्रका तर्फबाट गठबन्धन सरकारका अर्थमन्त्री बराल दुर्घटना भएका दिन गाडीमा सवार नभएको उनको सचिवालयले जनाएको छ ।
पाइजाको श्रीमतीको अवस्था भने सामान्य रहेको छ ।
