लमजुङ । कांग्रेस महाधिवेशनमा षड्यन्त्र गरेको भन्दै मतपत्र जलाउने श्रीकृष्ण पौडेल लमजुङको राइनास नगरपालिकाको सभापति पदमा विजयी भएका छन्। शेरबहादुर देउवा पक्षका नेताले षड्यन्त्र गरेको भन्दै मतपत्र जलाउने उनले शनिवार भएको निर्वाचनमा १ सय २२ मत ल्याउँदै सभापति पदमा जित हासिल गरेका हुन्।
रामचन्द्र पौडेल पक्षका उनले सभापतिका अर्का उम्मेद्वार नुरराज कडरियाले ७५ मत ल्याएको निर्वाचन अधिकृत दिनेश चिलुवालले जानकारी दिएका छन्। राइनासमा २ सय २ जना मतदाता छन्।
उपसभापतिमा सन्तोष गुरुङ र राजकुमार भुजेल, सचिवमा गोबिन्द चिलुवाल र चित्रकुमार श्रेष्ठ, सहसचिवमा मोहन शर्मा चिलुवाल र जनकराज न्यौपाने विजयी भएका छन्। गत शनिवार कांग्रेसको जारी १४ औँ महाधिवेशन अन्तर्गत राइनास नगरपालिकामा विवाद भएको थियो। सभापति देउवा पक्षका नेताले षड्यन्त्र गरेको भन्दै वरिष्ठ नेता रामचन्द्र पौडेल पक्षले मतपत्र जलाएका थिए।
